Монгол Улсын эдийн засгийн өсөлтийг энэ онд 7 хувьд хадгалахыг хичээж байгааг Монголбанкны ерөнхийлөгч Б.Лхагвасүрэн тус банк байгуулагдсаны 100 жилийн ой энэ онд тохиож буйтай холбогдуулан манай улсад ажиллаж буй гадаадын хэвлэл мэдээллийн байгууллагын төлөөллийг хүлээн авч уулзах үеэрээ тэмдэглэв.
Тэрбээр, Монгол Улсын эдийн засаг өнгөрсөн онд 7 хувийн өсөлтттэй гарсан, төлбөрийн тэнцэл, урсгал тэнцэл ашигтай гарсан зэрэг нь эдийн засаг тогтворжиж байгаа тоон үзүүлэлт юм. Үүнд уул уурхай, тээврийн салбарын өсөлттэй холбоотой. Одоогоор 5.2 тэрбум ам.долларын валютын нөөцтэй байгаа учир ханш тогтвортой байгаа. Ханш өнгөрсөн онд 2 хувиар чангарсан, энэ онд ч байдал хэвээр үргэлжилнэ. Энэ оны гуравдугаар сард инфляц 7 хувь хүрсэн нь төв банкны бодлогын зорилтот түвшинд байлаа. Иймд мөнгөний хатуу бодлогоо зөөлрүүлж, 13 хувь байсныг нэг нэгж хувиар бууруулсан. Цаашид нөхцөл байдал таатай хэвээр үргэлжилвэл дахин багасгах боломжтойг тодотгож байлаа.
Түүнчлэн, арилжааны банкууд өнгөрсөн онд нийт 470 тэрбум гаруй төгрөгийн IPO хийж, банкны санхүүгийн чадавх сайжирсан аж.
Монгол, Оросын хамтарсан банкыг анх 1924 оны зургаадугаар сарын 2-нд Сэлэнгэ аймгийн Алтанбулаг суманд байгуулж, арилжааны шинжтэй үйл ажиллагаа явуулж байсныг тус уулзалтын үеэр төв банкны захирал дурдсан юм.
Сэтгэгдэл бичих