Орон сууцны ундны усны чанарын талаар мэргэшсэн болон зөвлөх инженерүүд өнөөдөр зөвлөлдлөө.
Механик байдлаар хэрэглэгчийн гэрт орж тоолуурыг нь хардаг, хэрэглэгчид өөрсдөө мэдээлдэг зэрэг бэрхшээлтэй байдлыг халж, цахим технологийг нэвтрүүлэхээр ажиллаж байгаа талаар Орон сууц нийтийн аж ахуйн удирдах газар ОНӨААТҮГ-ын дотоод хяналтын инженер Т.Янжинлхам дараах зүйлсийг онцлов.
Тэрбээр "Усны тоолуурын системийг ухаалаг технологи руу шилжүүлэх юм бол хөрөнгө мөнгө хэмнэнэ. Мөн усны тоолуурын заалтыг үнэн зөв авдаг болно.
Дэлхийн олон улс оронд нэвтэрсэн байдаг уг технологийг манай оронд шууд нэвтрүүлэхэд социализмын үед баригдсан барилгуудын инженерийн шугам сүлжээний онцлог хүндрэл болж байна. Тэдгээр асуудлыг шийдвэрлэхэд маш их хөрөнгө мөнгө зарцуулагдах учир зохих шийдвэр гаргах түвшний хүмүүст нь танилцуулж, шийдлийг олох ажил хийгдэж байна.
Манай дээр ирж буй гомдлын дийлэнхийг төлбөр тооцоотой холбоотой маргаан голлож байдаг. Иймд үүнийг технологийн шийдэл ашиглаж шийдэх хэрэгтэй байгаа юм" гэв.
Айл өрхүүдийн усны тоолууржуулалт 2019 онд 76 хувь байсан бол 2023 онд 86 хувь болж өссөн байна. Үлдсэн айл өрхүүдийг тоолууржуулахад насжилт өндөртэй хуучны барилга, гадна, дотор шугам сүлжээний эргэлтийн шугамгүй мөн нэг байрыг өрөө өрөөгөөр нь түрээсэлдэг байрны хэрэглэгчид болон нийтийн байранд бодит хэрэгцээгээ тооцоолох боломжгүй зэрэг асуудал тулгарч байгаа аж.
Түүнчлэн анхнаасаа барилгыг барихдаа хэрэглэгчийн халуун, хүйтэн усны тоолуурыг орцонд байрлуулчих юм бол ухаалаг тоолуур суурилуулахад илүү хялбар болно гэдгийг мэргэжилтнүүд онцолж байв.
Сэтгэгдэл бичих