МАН-ын Ерөнхий нарийн бичгийн дарга Я.Содбаатар Авлигатай тэмцэх газарт шалгуулж, нэр төрөө сэргээлгэх болно гэдгээ намынхандаа мэдэгджээ.
Улаанбаатар хотын захирагч асан Х.Нямбаатарын хийсэн мэдээллээр Ардын намын хэд, хэдэн гишүүн авлигын асуудалд нэр холбогдсон дотор генсек Я.Содбаатар нэр дурдагдсан юм.
Ерөнхий сайд Н.Учралын хувьд “2019 онд Я.Содбаатар төрийн өндөр дээд албан тушаал хашиж байгаагүй” гэж мэдэгдсэн. Гэхдээ Я.Содбаатар нь 2016 оны УИХ-ын сонгуульд Өвөрхангай аймагт нэр дэвшин ялалт байгуулснаар парламентад УИХ-ын гишүүн болсон байв. Мөн 2018 онд Зам тээврийн сайдаар томилогдож, 2019 онд чөлөөлөгдсөн. Нам дотроо МАН-ын Удирдах зөвлөлийн гишүүнээр ажилладаг байв. Ерөнхийлөгч У.Хүрэлсүхийн ойрын хүрээллийн хүн тул Засгийн газрын танхимд нь багтаж ажилласан. Гол нь Ардын намын гишүүд олноороо Жижиг, дунд үйлдвэрлэлийг хөгжүүлэх сангаас жилийн зургаан хувийн хүүтэй зээл авч, ард иргэдийнхээ боломжийг хулгайлсан асуудалд нэр холбогдоход сайд Я.Содбаатарын хамаарал бүхий компани мөн тус сангаас зээл авсан нь тодорхой болсноор ёс зүйн хариуцлага хүлээж, Засгийн газрынхаа гишүүнээс чөлөөлөгдсөн юм.
Тухайн үед Я.Содбаатар тус хамаарал бүхий компани Жижиг дунд үйлдвэрлэлийг хөгжүүлэх сангаас зээл аваагүй гэж гүрийсэн ч дараа нь хүлээн зөвшөөрч байв.
Улмаар УИХ-ын 2020 оны сонгуулиас завсарлага авсан. Гэхдээ 2021 оны Ерөнхийлөгчийн сонгуульд У.Хүрэлсүх ялалт байгуулсны дараа Ерөнхийлөгчийн Тамгын газрын дарга болсон юм. Харин МАН дотор том зодоон үүсэж, 1980-аад оныхныг дарах хөдөлгөөн өрнөсний дараа Я.Содбаатар Тусгаар тогтнолын ордонд ирж, МАН-ын Ерөнхий нарийн бичгийн дарга болсон билээ. Энэ хугацаанд хамаарал бүхий компани нь төрийн олон тендер авсан асуудал хөндөгдсөн бол төрийн томилгоонд ч хуруу дүрж эхэлснийг хэвлэлүүд олонтаа бичих болсон. Хамгийн сүүлд Өвөрхангай аймгийн Засаг даргаар Хүнс хөдөө аж ахуй хөнгөн үйлдвэрийн яамны Төрийн нарийн бичгийн дарга асан Т.Жамбалцэрэнг томилуулсан тухай шуугиж буй. Үндсэндээ нутгийн өөрөө удирдах ёсыг уландаа гишгэж, дээрх томилгоо хийгдсэн.
Харин Монгол Улсын төрийн тэргүүн У.Хүрэлсүх ажлаа өгөх болсноор Монгол Улсын Ерөнхийлөгчийн сонгууль ирэх гуравдугаар сард товлон зарлагдах болж буй. Үндсэндээ сонгууль хаяанд тулсан гэж хэлж болно. Иймээс МАН Ерөнхий нарийн бичгийн дарга Я.Содбаатараа огцруулах уу, аль эсвэл Ерөнхийлөгчийн сонгууль хугацаа нь тулсан тул гүрийгээд хуучин генсектэйгээ орох уу гэдэг асуудал ойрын хугацаанд босох нь ээ. МАН-ын дарга генсекээ солихгүй гэдэг байр суурь барьж буй. Ямартай ч Х.Нямбаатарын хийсэн мэдээлэлтэй холбогдуулж Засгийн газрын Хэрэг эрхлэх газрын дарга Б.Энхбаяр , Хууль зүй, дотоод хэргийн дэд сайд Д.Мөнх-Эрдэнэ нар чөлөөлөгдөх хүсэлт гаргасныг Ерөнхий сайд хүлээн аваад байна.
Г.ХОРОЛ

Сэтгэгдэл бичих