ОХУ-ын ерөнхий сайд Михаил Мишустин форумын нэгдсэн хуралдаанд хэлсэн үгэндээ “Made in Russia” үндэсний брэндийн хүрээнд 2500 гаруй аж ахуйн нэгж 30 мянган бүтээгдэхүүндээ гэрчилгээ аваад байгааг онцолжээ. Эдгээр гэрчилгээний долоо тутмын нэг нь өндөр технологийн бүтээгдэхүүнд олгогдсон байна. Тэрбээр Орос улс харилцан ашигтай эдийн засгийн хамтын ажиллагаа, бүтээлч яриа хэлэлцээнд нээлттэй хэвээр байгааг дурдаад, тус улсын компаниуд аж үйлдвэрийн бүтээгдэхүүнээс эхлээд дотооддоо хөгжүүлсэн дижитал технологи хүртэл олон төрлийн бүтээгдэхүүн, үйлчилгээ санал болгож байгааг тэмдэглэсэн байна.
Мөн Оросын нийт экспортын 35 орчим хувийг эрдэс баялаг, эрчим хүчний бус бүтээгдэхүүний экспорт бүрдүүлж байгааг мэдээлжээ.
2026 оны эхний найман сарын байдлаар тус улсын экспорт өмнөх оны мөн үеэс 14 гаруй хувиар өсөж, 23 их наяд рубль буюу ойролцоогоор 280 тэрбум ам.долларт хүрсэн байна. Түүнчлэн экспортын төлбөр тооцоонд үндэсний мөнгөн тэмдэгтийн эзлэх хувь 91 хувийг давсныг ерөнхий сайд онцолжээ.
Харин ОХУ-ын ерөнхийлөгчийн туслах Владимир Мединский түүхий эдийг боловсруулалгүйгээр экспортлоход түшиглэсэн эдийн засаг нь цаашдын хөгжлийн гарц биш гэдгийг онцолсон байна. Түүний үзэж буйгаар түүхий эдээ дотооддоо боловсруулж, нэмүү өртөг шингэсэн бүтээгдэхүүн үйлдвэрлэх нь эдийн засгийн ирээдүйн гол чиглэл юм. Мөн дотоодын үйлдвэрлэл, бизнес эрхлэгчдийг төрөөс дэмжиж, аж ахуйн нэгжүүд эх орондоо үйл ажиллагаа явуулж, татвараа төлөн, бизнесээ өргөжүүлэх таатай нөхцөлийг бүрдүүлэх шаардлагатайг мэдэгджээ.
ЭХ СУРВАЛЖ: XINHUA

Сэтгэгдэл бичих