Нийгмийн сүлжээнд хүүхдийн оролцоог зохицуулах тухай хуулийн төсөл болон хамт өргөн мэдүүлсэн хуулийн төслүүдийг УИХ-ын чуулганы нэгдсэн хуралдаанаар хэлэлцэж байна.
Энэ үеэр УИХ-ын гишүүн С.Эрдэнэболд Дархан, Сэлэнгэ, Төв аймгийн 72,800 гаруй хүүхдэд захидал бичиж, хүүхдүүдээс ирсэн 600 орчим захидлыг хуулийн төслийн ажлын хэсэгт хүргүүлэхээ мэдэгдлээ.
Тэрбээр “Бид энэ хуулийг хүүхдүүдээс асууж, саналыг нь сонсох хэрэгтэй. Хүүхдүүдийн байр суурь өөр байна. Тэд бид муу хүмүүс биш. Сошиал сүлжээнд зарцуулах цагаа багасгахад оронд нь юу хийх вэ гэдэг агуулгыг гаргаж өгөөч гэж байна” хэмээв.
Мөн "Хүүхдүүдийн цахим хэрэглээг хязгаарлахаас гадна тэдэнд зөв агуулга, үндэсний өв соёл, зан заншлаа танин мэдэх боломж олгох шаардлагатай. Өөрсөд дээрээ бодоод үзэхэд ухаалаг утас гарахаас өмнө Солонгосын цувралууд нэгнээсээ хэрхэн харгис хэрцгийгээр өшөө авахыг нийгэмд харуулж байсан. Одоо Хятадын богино хэмжээний кинонууд мөнгөтэй бол хүн болдог гэсэн ойлголт өгч байна. Гэтэл хэрхэн үндэсний зан заншлаа эрхэмлэсэн монгол хүн байхыг таниулах агуулгын орон зайг бий болгох хэрэгтэй. Гэр бүл, боловсролын асуудал хариуцсан яамдууд үүнд анхаарах шаардлагатай. Шууд хорьж цагдахын оронд хүүхдүүдийн ухамсартайгаар төлөвших орон зайг нэмэгдүүлээч" гэж ярилаа.
Түүнчлэн Монгол Улсын иргэдийн цахим идэвх дэлхийн дунджаас өндөр, тэр дундаа хүүхдүүдийн цахим хэрэглээ өндөр байгааг дурдаад, зохицуулалт хийхийн зэрэгцээ иргэдэд ойлгомжтой, тодорхой байдлаар хэрэглээний зөвшөөрөгдөх болон хориглох хязгаарыг тогтоох нь чухал. Нийгмийн сүлжээнд хүүхдийн оролцоог зохицуулах тухай хуулийн төслийг үзэл баримтлалын хувьд дэмжиж байгаагаа илэрхийллээ.
Сэтгэгдэл бичих