Байгаль орчин, уур амьсгалын өөрчлөлтийн яам болон ШУА-ийн Биологийн хүрээлэн хамтран эрчим хүч, үйлдвэрлэлийн бүс орчмын хөрсний бохирдлыг бууруулах төсөл хэрэгжүүлж байна.
Төслийн хүрээнд ТЭЦ-4 орчмын 12 цэгээс хөрсний дээж авч, эрүүл ахуйн бохирдлыг судлан, дотоодын судлаачдын гарган авсан “Био-Ариус” бэлдмэлийн үр нөлөөг шинжилжээ. Шинжилгээгээр бэлдмэл хэрэглэхээс өмнө 12 цэгийн найм нь их, хоёр нь дунд, хоёр нь бага бохирдолтой ангилалд байсан бол ариутгалын дараа долоон цэг бага, гурван цэг дунд бохирдолтой, хоёр цэг цэвэр ангилалд шилжсэн байна.
Түүнчлэн термофил бичил биетний тоо 10–100 дахин буурсан бөгөөд бүх цэгт бактерийн нийт тоо багасжээ. Судалгааны үр дүн нь “Био-Ариус” бэлдмэл хөрсний өтгөн, ялгадаснаас үүдэлтэй эрүүл ахуйн бохирдлыг бууруулах боломжтойг харуулж байгаа аж. Гэхдээ хөрсний бохирдлыг бүрэн арилгасан эсэх болон үр нөлөө хэр удаан хадгалагдахыг тогтооход нэмэлт судалгаа шаардлагатай гэжээ.
Сэтгэгдэл бичих