АНУ-ын гурав дахь том банк болох "Bank of America" нь мөнгө угаах болон бусад хууль бус үйл ажиллагааг илрүүлж, мэдээлэх үүргээ биелүүлээгүйн улмаас 1.2 тэрбум ам.долларын торгууль төлөхөөр болжээ. Энэ талаар АНУ-ын Сангийн яам Мягмар гаригт /2026.10.13/ мэдээлсэн байна.
Тус банк нийт таван тэрбум гаруй ам.долларын сэжигтэй гүйлгээний талаар эрх бүхий байгууллагуудад мэдээлээгүй аж. Үүний нэг тэрбум ам.доллар нь үндэсний аюулгүй байдал болон хууль бус санхүүжилттэй холбоотой эрсдэл үүсгэж болзошгүй байжээ. Түүнчлэн тус банк Хятадын мөнгө угаах сүлжээтэй холбоотой байж болзошгүй гүйлгээ болон худалдааны төлбөр тооцоогоор дамжуулан мөнгө угаасан байж болзошгүй тохиолдлуудыг илрүүлж, мэдээлээгүй гэж АНУ-ын Сангийн яам мэдээлжээ.
АНУ-ын Сангийн яамны мэдээлснээр, "Bank of America" өөрийн дотоод хяналтын тогтолцоонд хангалттай найдалгүй, хууль сахиулах байгууллага болон бусад санхүүгийн байгууллагаас ирүүлсэн мэдээлэлд хэт түшиглэж байжээ.
Торгуулийн 750 сая ам.долларыг АНУ-ын Валютын хяналтын алба ногдуулсан бөгөөд энэ нь тус байгууллагын түүхэн дэх хамгийн өндөр торгууль болжээ.
Мөн АНУ-ын Гадаад хөрөнгийн хяналтын алба тус банк ОХУ, Иран болон хар тамхины наймаа, терроризмтой холбоотой хориг арга хэмжээг зөрчсөн байж болзошгүй 475 тохиолдлыг тогтоосон байна. Гэхдээ эдгээр зөрчлийг ноцтой бус гэж үзсэн тул тус албанаас ногдуулсан торгуулийн хэмжээ 11.6 сая ам.доллар байжээ.
Тус банкны мэдээлснээр, торгууль төлөх болсонтой холбогдуулан гуравдугаар улирлын цэвэр ашиг нь буурна. Уг торгууль нэгж хувьцаанд ногдох ашгийг 17 центээр бууруулах тооцоотой байна. Мөн банк дотоод хяналтаа сайжруулж, зохицуулагч байгууллагуудын шаардлагыг биелүүлэхээр ажиллаж байгаа аж.
ЭХ СУРВАЛЖ: BBC
Сэтгэгдэл бичих