Монгол Улсын Ерөнхийлөгчийн ивээл дор зохион байгуулж буй “Эх хэл – Нэг Монгол” монгол хэлний багш нарын бүсийн зөвлөгөөн Баруун, Хойд, Говийн бүсийн хүрээнд Ховд, Орхон, Дундговь аймгийн төвд тус тус болжээ.
Зөвлөгөөнд дээд болон мэргэжлийн боловсролын сургалтын байгууллага, ерөнхий боловсролын сургууль, сургуулийн өмнөх боловсролын байгууллага, аймгийн Боловсролын газрын төлөөлөл зэрэг нийт 355 хүн оролцсон байна.
Нэгдсэн хуралдааныг нээж, Боловсролын сайд Л.Энх-Амгалан цахимаар мэндчилгээ дэвшүүлжээ. Тэрбээр эх хэлээрээ уншсан зүйлээ ойлгох чадварыг сайжруулахад чиглэсэн энэхүү зөвлөгөөн чухал ач холбогдолтойг онцолж, “Монгол орны тусгаар тогтнолын баталгааны нэг бол эх хэлний боловсрол юм” хэмээн тэмдэглэсэн байна.
Зөвлөгөөний хүрээнд сургалтын хөтөлбөрийн хэрэгжилт, багшийн хөгжил, монгол хүүхдийн эх хэлний боловсролын өнөөгийн нөхцөл байдал, тулгамдсан асуудал, тэдгээрийг шийдвэрлэх арга замын талаар гурван салбар хуралдаан зохион байгуулж, илтгэл хэлэлцүүлжээ.
Мөн монгол хэл, бичиг, уран зохиолын сургалтын хөтөлбөрийн хэрэгжилт, тулгамдаж буй асуудал, шийдвэрлэх арга зам, туршлага, үр дүнг хэлэлцсэн байна. Салбар хуралдаануудаас гарсан зөвлөмжийг танилцуулж, үндсэн зөвлөгөөнд дэвшүүлэх зөвлөмжийн төслийг хэлэлцэн батлахаар төлөвлөжээ.
Сэтгэгдэл бичих