Дорноговь аймгийн Замын-Үүд сум дахь “Бүс нутгийн логистикийн төв” энэ онд 1.8 сая тонн ачаа боловсруулж, 111 мянган чингэлэг ачиж, буулгахаар төлөвлөжээ.
Орос, Монгол, Хятад гурван улсыг холбосон эдийн засгийн коридорын гол зангилаа болсон тус төвийг Монгол Улсын Засгийн газар Азийн хөгжлийн банктай хамтран 2018 онд ашиглалтад оруулжээ. Нийт 128 га талбай бүхий логистикийн төв нь чингэлэг, хүнд даацын болон агуулахын гэсэн гурван бүстэй.
Хоногт 800 вагон нэвтрүүлэх хүчин чадалтай бөгөөд өргөн, нарийн царигийн ачилт, буулгалтын 11.5 км төмөр зам, 50 тонн даацтай хоёр гүүрэн крантай юм. Мөн 3,200 чингэлэг багтаах талбай, том оврын 133 автомашины зогсоол, гаалийн барилга, ажилчдын байр, механик засварын төв болон хүнд даацын гүүрэн байгууламжтай.
Замын-Үүд дэх шилжүүлэн ачих анги нь БНХАУ-аас төмөр зам болон авто замаар ирсэн ачааг дөрвөн үндсэн талбайд 24 цагийн турш вагоноос вагонд, автомашинаас вагонд шилжүүлэн ачиж, буулгадаг байна.
Тус төв ашиглалтад орсноор царигийн зөрүүтэй төмөр замуудын хооронд ачаа шилжүүлэн ачих хугацааг багасгаж, төмөр замын хилийн боомтын хүчин чадлыг нэмэгдүүлэх боломж бүрджээ. Улмаар Монгол Улсын импорт, экспорт болон дамжин өнгөрөх тээврийн эргэлтийг нэмэгдүүлэхэд хувь нэмэр оруулж байгаа талаар салбарын удирдлагууд танилцуулсан байна.
Цар тахлын үед агаарын болон авто замын тээвэр бүрэн зогссон нөхцөлд Монголын Засгийн газар БНХАУ-ын талтай ачаа солилцох “0” цэгийг тохиролцож байжээ. Үүний дагуу хүнс, өргөн хэрэглээний бараа бүтээгдэхүүн, эм, эмнэлгийн хэрэгсэл бүхий 26 мянга гаруй чингэлгийг тус төвөөр дамжуулан татан авсан байна.
Түүнчлэн “УБТЗ” ХНН, Тавантолгойн төмөр зам болон Багахангай–Хөшигийн хөндий–Эмээлт чиглэлийн төмөр замын бүтээн байгуулалтад шаардлагатай 30 гаруй мянган зам төмрийг ачиж нийлүүлжээ.
Эх сурвалж: Зам, тээврийн яам
Сэтгэгдэл бичих