Баасан гарагт АНУ Оросын дизель түлшний экспортод тавьсан зарим хоригийг дөрөвдүгээр сарын 7 хүртэл түр хугацаанд зөөлрүүлэх тохиролцоонд хүрчээ.
Харин Зеленьский энэ шийдвэрийг эсэргүүцэж, Москва уг орлогоороо шинэ зэвсэг худалдан авч, дайн үргэлжлэх боломжтой болохыг шүүмжлэв.
Бямба гарагт Трамп “Зеленський Оросын газрын тос боловсруулах үйлдвэрүүдэд цохилт өгөх ажиллагааг үргэлжлүүлж байгаа нь дэлхий дахинд хүндрэл учруулж байна.
Тэр олон удаа хэлэлцээр хийх боломжтой байсан ч ямар нэг шалтгаанаар хэзээ ч тохиролцоонд хүрдэггүй. Хэлэлцээр хийж чаддаг шинэ удирдагч Украинд хэрэгтэй.
Бид Орос руу хүссэнээ хийж болно гэж хэлсэн. Гагцхүү газрын тос боловсруулах үйлдвэрүүдийг бүү онил гэж хүссэн. Учир нь энэ нь дэлхийн хэмжээний асуудал болоод байна” гэжээ.
Шинэ хэлэлцээр нь АНУ-д шатахууны үнийг бууруулах Трампын оролдлогын нэг хэсэг гэж ажиглагчид үзэж байна. Ираны дайны дараагаар дизель түлшний үнэ эрс өсөж, инфляц дахин нэмэгдэхэд нөлөөлсөн.
Одоогоор АНУ-д дизель түлшний дундаж үнэ нэг галлон нь 6.28 ам.долларт хүрсэн. Энэ нь өнгөрсөн сарын 5.94 ам.доллар, жилийн өмнөх 3.68 ам.доллароос мэдэгдэхүйц өссөн үзүүлэлт юм.
Хэлэлцээрийн хүрээнд ОХУ эхний ээлжид 300 мянган тонн дизель түлш нийлүүлж, дараагийн шатанд 500 мянган тонн болон түүнээс дээш хэмжээгээр экспорт хийхээр тохиролцжээ.
Сүүлийн 10 сарын хугацаанд Украины дроны цохилтуудын улмаас Оросын газрын тос боловсруулах үйлдвэрүүдэд доголдол үүсэж, тус улсын дизель түлшний үйлдвэрлэл ойролцоогоор 30 хувиар буурсан гэж Олон улсын эрчим хүчний агентлаг мэдээлжээ.
Эх сурвалж: BBC
Сэтгэгдэл бичих