Нийслэлийн Сонгинохайрхан дүүргийн 20 дугаар хорооны нутаг дэвсгэрт хамаарах Туул голын ай сав газар хуримтлагдсан 1.1 сая тонн хог хаягдлыг цэвэрлэж, цэцэрлэгт хүрээлэн байгуулахаар болжээ.
Тус газрын ойролцоо иргэн, аж ахуйн нэгжүүд зөвшөөрөлгүй барилгын хур хог хаяснаас болж өнөөдрийн байдлаар 38.7 га талбайд 1.1 сая тонн хог хуримтлагдсан байна. Сонгинохайрхан дүүргийн Засаг даргын Тамгын газраас 20 дугаар хорооны гурван байршилд найман хяналтын камерыг байршуулсан бөгөөд хууль зөрчин хог хаясан таван байгууллага, дөрвөн иргэнд зөрчлийг арилгах мэдэгдэл хүргүүлж, Нийслэлийн Байгаль орчны газар, Экологийн цагдаагийн алба зэрэг холбогдох байгууллагуудад зөрчил гаргасан аж ахуй нэгжид яаралтай арга хэмжээ авч шийдвэрлэх тухай мэдэгдлийг хүргүүлжээ.
24 байршилд хуримтлагдсан дээрх хур хогийг ачиж тээвэрлэж цэвэрлэхэд 9.8 тэрбум төгрөг шаардлагатай гэсэн тоон судалгаа гарсан байна. Энэ асуудалтай холбогдуулан Нийслэлийн Засаг дарга Б.Пүрэвдагва 20 дугаар хорооны нутаг дэвсгэр, Туул голын ай сав газарт өнөөдөр ажиллаж, хэд хэдэн шийдвэр гаргажээ. Тухайлбал, мэргэжлийн байгууллагаар Туул голын ай сав газарт хөрсний бохирдлыг судлуулах, байгаль орчны үнэлгээ гаргах, тухайн газрын ойролцоо байгаа худгуудад хөрсний бохирдлын судалгаа хийх, дээрх байршилд зөвшөөрөлгүй хог хаясан барилгын компаниудаар зөрчлийг арилгуулж, хог ачиж тээвэрлэхтэй холбоотой зардлыг гаргуулах. Зөрчлийг арилгаагүй тохиолдолд тусгай зөвшөөрлийг цуцлахаар болов.
Энэхүү бүс нутгийн 1.1 сая тонн хог хаягдлыг ачиж цэвэрлэсний дараа дээрх байршилд ариутгал, нөхөн сэргээх ажлыг зохиоэ байгуулж, цэцэрлэгт хүрээлэн байгуулахаар бослсон байна. Түүнчлэн шинээр авто барих трасс төлөвлөхийг үүрэг болгожээ.
Сэтгэгдэл бичих