Зам, тээврийн сайд Б.Дэлгэрсайхан БНХАУ-ын “AVIC International” компанийн Ерөнхийлөгч Сон Лин (Song Ling) тэргүүтэй төлөөлөгчидтэй уулзаж, хоёр улсын иргэний нисэхийн салбарын хамтын ажиллагааг төсөл хөтөлбөрөөр өргөжүүлэх, хүний нөөцийн чадавхыг бэхжүүлэх тухай ярилцлаа.
Тэрбээр, Улаанбаатар хот болон Сайншандын “Бүсийн нислэгийн хөдөлгөөний удирдлагын төв”-д шаардлагатай нислэгийн 40 удирдагч, 10 инженерийг БНХАУ-д сургах хүсэлтэйгээ илэрхийлсэн байна. Сургалтыг БНХАУ-ын Иргэний нисэхийн нислэгийн их сургуульд зохион байгуулахаар “Иргэний нисэхийн үндэсний төв” ТӨХХК “AVIC International” компанитай хамтран ажиллаж байна.
Түүнчлэн одоо ажиллаж буй нисэлгийн 23 удирдагчийг зэрэглэл олгох сургалтад хамруулах, цаашид Монгол Улсын иргэний нисэхийн мэргэжилтнийг БНХАУ-д тогтмол сургах урт хугацааны хамтын ажиллагааг хөгжүүлэх санал дэвшүүлснийг ЗТЯ мэдээллээ.
Уулзалтын үеэр БНХАУ-ын Иргэний нисэхийн нислэгийн их сургуулийн удирдлагууд нислэгийн хөдөлгөөний удирдлага, нислэгийн диспетчер, нисэхийн удирдлага, инженерчлэл, нам өндрийн нисэх технологийн чиглэлээр мэргэжилтэн бэлтгэх сургалтын хөтөлбөр, үйл ажиллагааг танилцуулав.
ЗТЯ-наас “Иргэний нисэхийн үндэсний төв” ТӨХХК, “AVIC International” компанийн хамтын ажиллагааг үр дүнд хүргэхэд цаашид шаардлагатай дэмжлэг үзүүлэхээ илэрхийлж, БНХАУ-ын Иргэний нисэхийн нислэгийн их сургуульд Монгол Улсын Иргэний нисэхийн дүрмийн дагуу олгож буй гэрчилгээг гардуулан өгчээ.
Талууд хүний нөөцийг сургаж чадавхжуулах, техник, технологийн хамтын ажиллагааг хөгжүүлэх чиглэлээр мэдээлэл солилцож, Монгол Улсын “Иргэний нисэхийн үндэсний төв” ТӨХХК, БНХАУ-ын “AVIC International” компани харилцан ойлголцлын санамж бичиг байгуулан хамтран ажиллахаар тохиролцсон байна.
Сэтгэгдэл бичих