Зам, тээврийн сайд Б.Дэлгэрсайхан БНХАУ-д албан айлчлан, тус улсын Иргэний нисэхийн удирдах газрын харьяа Нислэгийн хөдөлгөөний удирдлагын товчоо, ШУА-ийн Цахилгаан инженерийн хүрээлэнгийн удирдлагатай уулзаж, Монголд аянга илрүүлэх сүлжээ байгуулах харилцан ойлголцлын санамж бичиг байгууллаа.
ЗТЯ-ны мэдээлснээр, хамтын ажиллагааны хүрээнд талууд Монголд аянгыг эрт илрүүлэх, мэдээллийг шуурхай хүлээн авах, холбогдох байгууллагад хүргэх нэгдсэн сүлжээг хамтран байгуулах юм. Ингэснээр аянга, цаг агаарын аюултай үзэгдлээс үүдэх эрсдэлийг эрт илрүүлж, урьдчилан сэрэмжлүүлэх боломж нэмэгдэхийн зэрэгцээ нисэхийн аюулгүй байдлыг хангахад ач холбогдолтой.
Түүнчлэн аянгын мэдээллийг төмөр зам, эрчим хүч, уул уурхай, барилга, хөдөө аж ахуй зэрэг салбарын аюулгүй ажиллагаанд өргөн ашиглах боломжтой. Мөн Монгол Улсын өргөн уудам нутаг дэвсгэр, цаг агаарын эрс тэс нөхцөлийг харгалзан уг сүлжээний мэдээллийг ой, хээрийн түймрийн эрсдэлийг эрт илрүүлэх, онцгой байдлын үйл ажиллагааг шуурхай зохион байгуулах, иргэдэд сэрэмжлүүлэг хүргэх зэргээр ашиглах юм.
Энэ төсөл нь иргэний нисэхийн салбарын хамтын ажиллагаанаас эхэлж байгаа ч цаашид гамшгийн эрсдэлийг багасгах, хүн ам, эд хөрөнгө, байгаль орчныг хамгаалах чиглэлээр олон салбарт үр өгөөжөө өгөх боломжтойг сайд Б.Дэлгэрсайхан онцолж, ЗТЯ төслийг амжилттай хэрэгжүүлэхэд бүх талаар дэмжихээ илэрхийлжээ.
Сэтгэгдэл бичих