Франкфуртийн нисэх буудлын хоёр ажилтан хумхаа өвчний тархалттай бүс нутгаас онгоцоор дамжиж ирсэн шумуулд хазуулсныхаа дараа нас барсныг тус буудлын оператор компани Fraport болон хотын эрүүл мэндийн албаныхан Лхагва гарагт мэдээлжээ.
Эхний ажилтан долдугаар сарын эхээр, хоёр дахь ажилтан наймдугаар сард нас барсан бөгөөд үхлийн шалтгааныг сүүлд шинжилж тогтоосноо Франкфурт хотын эрүүл мэндийн алба тайлбарласан байна.
Нисэх буудлын нийт зургаан ажилтан хумхаа өвчний хамгийн аюултай хэлбэр болох “malaria tropica” өвчнөөр ажлын байранд байхдаа халдварлажээ.
Бусад дөрвөн ажилтан нь эмчлүүлсний дараа эдгэрснийг эрх баригчид мэдээлсэн байна.
Долдугаар сарын дундуур Роберт Кокын Хүрээлэн нисэх буудлын ажилтнуудын дунд хумхаа өвчний дөрвөн тохиолдол бүртгэгдсэн талаар анх зарлаж байв.
Халдварыг нисэх онгоцоор дамжиж ирсэн Анофелес шумуул дамжуулсан гэж дүгнэжээ.
Импортлогдсон шумуулуудыг урхинд оруулан барьж, лабораторид шинжилж байгаа юм байна.
“Шумуулууд бүгд үхсэн гэж үзэж байна. Хүнээс хүнд халдварлах магадлал бага. Тиймээс Франкфуртийн оршин суугчдад учрах эрсдэл эрс багассан” гэж хотын эрүүл мэндийн газрын тэргүүн Питер Тиннерман мэдэгджээ.
Хумхаа нь шумуулаар дамждаг халдварт өвчин юм. Нисэх онгоцоор дамжин шумуул тархсан тохиолдол маш ховор байдаг. Хамгийн сүүлд 2023 онд Франкфуртийн нисэх буудалд ийм тохиолдол бүртгэгдсэнийг Роберт Кокын Хүрээлэн мэдээлжээ.
Сэтгэгдэл бичих