БНХАУ-ын дарга Ши Жиньпин ирэх есдүгээр сарын 24-нд АНУ-д төрийн айлчлал хийхээр төлөвлөж буйг АНУ-ын Ерөнхийлөгч Дональд Трамп Вашингтон хотод болсон нэгэн арга хэмжээний үеэр мэдэгдлээ. Хэрэв айлчлал товлосон ёсоор хэрэгжвэл энэ нь Ши Жиньпиний сүүлийн жилүүдэд АНУ-д хийх хамгийн өндөр түвшний айлчлалуудын нэг болох юм.
Энэхүү айлчлал нь Трампын өнгөрсөн тавдугаар сарын 14-15-нд Бээжин хотод хийсэн төрийн айлчлалын хариу айлчлал болох пм. Тухайн үеэр хоёр улсын төрийн тэргүүн нар худалдаа, эдийн засаг, аюулгүй байдал, бүс нутгийн нөхцөл байдал болон дэлхийн хэмжээний бусад асуудлаар албан ёсны хэлэлцээ өрнүүлсэн юм. Мөн тавдугаар сарын уулзалт нь АНУ, БНХАУ-ын харилцаа сүүлийн жилүүдэд хурцадмал байдалтай байсан нөхцөлд болсон бөгөөд хоёр тал санал зөрөлдөөнөө бүрэн шийдвэрлэж чадаагүй ч дээд түвшний харилцааны сувгийг сэргээхэд чухал алхам болсон гэж ажиглагчид үнэлж байсан.
АНУ-ын Төрийн нарийн бичгийн дарга Марко Рубио зургаадугаар сарын эхээр хийсэн мэдэгдэлдээ, Трампын Бээжинд хийсэн айлчлал тодорхой бодит үр дүн авчраагүй ч дэлхийн хамгийн нөлөө бүхий хоёр улсын удирдагчид нүүр тулан уулзаж, шууд харилцсан нь өөрөө хамгийн чухал үр дүн байсан гэж онцолжээ. Тэрбээр хоёр талын тогтмол яриа хэлэлцээ нь үл ойлголцлыг бууруулах, цаашдын хамтын ажиллагааны боломжийг нээхэд чухал ач холбогдолтойг тэмдэглэсэн байна.
Ирэх есдүгээр сарын уулзалтаар АНУ, БНХАУ-ын харилцааны цаашдын чиг хандлага, худалдаа, хөрөнгө оруулалт, технологийн өрсөлдөөн, тарифын бодлого, Тайванийн асуудал, Өмнөд Хятадын тэнгисийн нөхцөл байдал зэрэг бүс нутгийн аюулгүй байдлын асуудлуудыг хэлэлцэх төлөвтэй байна. Мөн Украин, Ойрхи Дорнодын нөхцөл байдал, уур амьсгалын өөрчлөлт, хиймэл оюун ухааны зохицуулалт зэрэг олон улсын анхаарлын төвд байгаа асуудлаар санал солилцох хүлээлттэй байгаа юм.
Хэдийгээр АНУ, БНХАУ-ын хооронд худалдаа, үндэсний аюулгүй байдал, өндөр технологийн салбар зэрэг олон асуудлаар санал зөрөлдөөн хэвээр байгаа ч хоёр орны удирдагчид дээд түвшний яриа хэлэлцээг үргэлжлүүлж, өрсөлдөөнийг мөргөлдөөнд хүргэхгүйгээр удирдах нь дэлхийн эдийн засаг, бүс нутгийн тогтвортой байдалд чухал нөлөө үзүүлнэ гэж шинжээчид үзэж байна.
Сэтгэгдэл бичих