Соёл, спорт, аялал жуулчлал, залуучуудын сайд Ж.Алдаржавхлан БНСУ-ын Пусан хотноо зохион байгуулж байгаа Дэлхийн өвийн хорооны 48 дугаар чуулганд оролцож байна.
Чуулганы үеэр Япон Улсын Боловсрол, соёл, спорт, шинжлэх ухаан, технологийн дэд сайд Шигеки Кобаяаши болон Тайландын Хаант Улсын Соёлын сайд Сабида Тайсеттай өнөөдөр уулзлаа. Соёл, спорт, аялал жуулчлал, залуучуудын сайд Ж.Алдаржавхлан Япон Улсын Боловсрол, соёл, спорт, шинжлэх ухаан, технологийн дэд сайд Шигеки Кобаяашитай уулзсан уулзалтаар хоёр орны соёл, спортын салбарын хамтын ажиллагаа сүүлийн жилүүдэд идэвхтэй хөгжиж буйг онцлон тэмдэглэж, цаашид илүү өргөжүүлэн ажиллах хүсэлтэй буйгаа илэрхийллээ.
Тухайлбал, Монголын Соёлын өвийн Үндэсний төв болон Япон Улсын Мацүра хотын “Усан доорх археологийн судалгааны төв”, “Нара их сургууль”-тай соёлын өвийг хадгалан хамгаалах чиглэлээр хамтран ажиллахаар эрх зүйн баримт бичиг байгуулж, ажиллаж эхэлжээ. Энэ хүрээнд соёлын өвийн мэргэжилтнүүдэд онол, практик хосолсон сургалт зохион байгуулахаар болов.
Түүнчлэн Тайландын Хаант Улсын Соёлын сайд Сабида Тайсеттай “Соёлын салбарт хамтран ажиллах тухай Монгол Улсын Засгийн газар болон Тайландын Хаант Улсын Засгийн газар хоорондын хэлэлцээр”-ийг 2006 онд байгуулсан бөгөөд соёлын өвийг хадгалан хамгаалах болон соёл, урлагийн чиглэлээр хамтын ажиллагаагаа идэвхжүүлэх талаар санал солилцов.
Соёл, спорт, аялал жуулчлал, залуучуудын сайд Ж.Алдаржавхлан жил тутам зохион байгуулдаг “Нүүдэлчин” дэлхийн соёлын фестиваль 2026-д Тайландын Хаант Улсын уран бүтээлч, соёлын өвлөн уламжлагч нарыг өргөн оролцохыг урьсан талаар ССАЖЗЯ-наас мэдээлэв.
Сэтгэгдэл бичих