Хиймэл оюуны засаглалын асуудлаарх анхдугаар чуулган Женевт эхэллээ

НҮБ-ын Хиймэл оюуны засаглалын асуудлаарх анхны яриа хэлэлцүүлэг (Global Dialogue on AI Governance) Швейцарын Женев хотноо даваа гарагт эхэлжээ. 

 

НҮБ-ын Ерөнхий Ассамблейн тогтоолоор санаачлан зохион байгуулж буй энэхүү чуулганд XXI зууны хамгийн нөлөө бүхий технологийн нэг болох хиймэл оюуныг зохицуулах нэгдсэн арга барилыг боловсруулахаар олон улсын төлөөлөгчид, бизнес эрхлэгчид, эрдэмтэд, иргэний нийгмийн зүтгэлтнүүд хуран цуглаад байна. 

 

Нээлтийн ажиллагаанд НҮБ-ын Ерөнхий нарийн бичгийн дарга Антониу Гутерриш оролцож, хэлэлцүүлгийн үндсэн чиг хандлагыг тодорхойлж үг хэллээ.

 

"Бид бол хүн төрөлхтөн болон машинууд зэрэгцэн орших дүрмийг тогтоож чадах хамгийн сүүлчийн үеийнхэн юм" хэмээн А.Гутерриш хэлжээ. Тэрбээр хиймэл оюунаас үүдэлтэй эрсдэлүүд хурдацтай нэмэгдэж байгааг анхааруулаад дэлхий хэмжээнд зохицуулах арга хэмжээг яаралтай авахыг уриалав.

 

"Хиймэл оюун хүн төрөлхтөн түүний хөгжлийг бүрэн гүйцэд хянаж амжихааргүй хурдаар хөгжиж байна. Бидний нийгэмд тодорхой төлөвлөгөөгүй, олон нийтийн зөвшөөрөлгүйгээр нэгэн төрлийн туршилт явагдаж байна. Энэ бол тогтворгүй, бас хүлээн зөвшөөрөх аргагүй асуудал юм. Өнөөдөр асуудал хиймэл оюун манай дэлхийг өөрчлөх үү, үгүй ​​юу гэдэгт биш харин тэр аль хэдийн өөрчлөөд эхэлчихсэнд оршиж байна. Харин бид энэхүү өөрчлөлтийг хамтдаа удирдан чиглүүлэх үү, эсвэл түүгээр өөрсдөө удирдуулах уу гэдэгт асуудал оршиж байна" хэмээн А.Гутерриш хэлжээ.

 

Яриа хэлэлцүлэг эхэлсэнтэй зэрэгцэн нэрт эрдэмтэн Йошуа Бенжио, Нобелийн Энх тайвны шагналт Мария Ресса нар хамтран даргалж буй Хиймэл оюуны асуудлаарх олон улсын хараат бус эрдэмтдийн зөвлөлийн анхны тайланг танилцуулсан юм. Уг баримт бичигт технологийн хөгжил нь эрх зүйн зохицуулалтын механизмаас хол түрүүлж байгааг онцлон тэмдэглэжээ.

 

Женевийн энэхүү яриа хэлэлцүүлэг долоодугаар сарын 6-7-ны өдрүүдэд Дэлхийн мэдээллийн нийгмийн асуудлаарх дээд хэмжээний уулзалттай (WSIS) зэрэгцэн явагдаж байна. Уг уулзалтын араас "Сайн сайхны төлөөх хиймэл оюун" дээд хэмжээний уулзалт (AI for Good Global Summit) долоодугаар сарын 7-10-нд болох бөгөөд ингэснээр Швейцарын Женев хот хиймэл оюуны асуудлаарх олон улсын хэлэлцүүлгийн гол төв болоод байна.