Гаалийн ерөнхий газраас 2026 оны эхний хагас жилийн байдлаар илрүүлсэн зөрчил, албан хаагчдын шилжилт хөдөлгөөн, сахилга хариуцлагын хүрээнд авсан арга хэмжээ болон Үндэсний их баяр наадмын үеэр гаалийн байгууллагын ажиллах зохион байгуулалтын талаар өнөөдөр /2026.07.07/мэдээлэл хийлээ. Гаалийн байгууллага 2026 оны эхний хагас жилийн байдлаар 2047 зөрчил илрүүлж, хянан шалгасан байна.
Үүний 47.1 хувь нь татвараас зайлсхийх, 23.5 хувь нь тарифын бус хязгаарлалттай буюу хориглосон, хязгаарласан барааг улсын хилээр нэвтрүүлэхийг завдсан зөрчил байжээ.
Энэ үзүүлэлт нь 2025 оны мөн үетэй харьцуулахад зөрчил илрүүлэлт 17.1 хувиар өссөн байна. Нийт илэрсэн зөрчлийн 52 нь эрүүгийн шинжтэй байсан бөгөөд хууль, хяналтын байгууллагад шилжүүлэн шалгуулж байна. Мөн оны эхний хагасын байдлаар мансууруулах болон сэтгэцэд нөлөөт бодистой холбоотой 12 зөрчлийг хууль, хяналтын байгууллагатай хамтран илрүүлж, харьяаллын дагуу шилжүүлжээ. Түүнчлэн олон улсын боомтуудаар алт хууль бусаар нэвтрүүлэхийг завдсан хэд хэдэн үйлдлийг гаалийн байгууллага илрүүлсэн байна.
Тухайлбал, 1.6 кг алт, мөн Бүгд Найрамдах Турк Улсаас ирсэн зорчигч биедээ нууж авч явсан 12.2 кг алтан эдлэлийг рентген хяналтын шалгалтаар илрүүлжээ.
Гаалийн байгууллагын мэдээлснээр, хориглосон, хязгаарласан болон тусгай зөвшөөрөл шаарддаг барааг улсын хилээр хууль бусаар нэвтрүүлэх оролдлого нэмэгдэж байна. Тухайлбал, чихрийн шижингийн хоёрдугаар хэлбэрийн үед хэрэглэдэг инсулин тариаг зорчигчид их хэмжээгээр авч орж ирж, арилжааны зориулалтаар худалдаалах зорилготой зөрчил цөөнгүй илэрч байгаа аж. Гаалийн байгууллагаас иргэдэд эм, эмнэлгийн зориулалттай бүтээгдэхүүнийг гар дээрээс болон цахим орчноос баталгаагүй эх үүсвэрээр худалдан авахгүй байхыг анхаарууллаа.
С.УЧРАЛ
Сэтгэгдэл бичих