Цагдаагийн байгууллагад энэ оны эхний гурван сарын байдлаар бүртгэгдсэн залилах гэмт хэргийн статистикаас үзэхэд цахим орчинд үйлдэгдсэн залилан дийлэнх хувийг эзэлж байна. Тодруулбал, цахим судалгаа нэрээр үйлдэгдсэн 398 хэрэг бүртгэгдэж, иргэдэд 1 тэрбум 651 сая 150 мянга 440 төгрөгийн хохирол учруулжээ. Харин "KFC", "Pizza Hut" сүлжээ хоолны газрын нэр барьсан хуурамч линк ашиглан бусдыг залилсан 236 хэрэг бүртгэгдэж, 1 тэрбум 225 сая 780 мянга 28 төгрөгийн хохирол учирсан байна. Мөн цахимаар бараа захиалахтай холбоотой 124 хэрэг бүртгэгдэж, 784 сая 694 мянга 684 төгрөг, данснаасаа мөнгө алдсан 36 хэрэгт 213 сая 129 мянга 200 төгрөг, гар утас залилж авч явсан 30 хэрэгт 58 сая 180 мянга 939 төгрөгийн хохирол тус тус бүртгэгджээ.
Үүнээс гадна банкны хэрэглэгчийн судалгаа, “Азтан боллоо” гэх хуурамч линк, валют солих, аппликейшний зээлийн эрх худалдах, хуурамч төлбөрийн баримт илгээх, "Facebook" чатаар мөнгө гуйх, тавилга захиалах, аялал, виз, байр түрээслэх, мал худалдах зэрэг олон төрлийн арга ашигласан залилангийн хэргүүд бүртгэгдсэн байна. Мөн тэтгэврийн данснаас мөнгө гаргаж өгнө, хамтран барилга барина, “Telegram”-аар даалгавар биелүүлээд мөнгө олно, шатахуун хямд үнээр нийлүүлнэ, “Alipay” цэнэглэх гэх мэт худал мэдээлэл тараан иргэдийг залилах тохиолдлууд ч бүртгэгджээ.
Иймд иргэд цахим орчинд ирсэн үл таних холбоос дээр дарахгүй байх, байгууллагын нэр барьсан хуурамч зар, мэдээллийг сайтар нягтлан үзэж, мөнгө шилжүүлэхээсээ өмнө тухайн мэдээллийн үнэн зөвийг баталгаажуулахыг мэргэжлийн байгууллагууд анхааруулж байна.
Сэтгэгдэл бичих