БНСУ: Хууль бусаар хүргэлтийн ажил хийж байсан 734 гадаадын иргэнийг илрүүлжээ

Өмнөд Солонгосын Хууль зүйн яамнаас таван сарын турш явуулсан өргөн цар хүрээтэй мөрдөн шалгалтаар хоол хүргэлтийн салбарт бусдын эзэмшлийн, түрээсэлсэн эсвэл хулгайлагдсан аппликэйшний хаяг ашиглан хууль бусаар ажиллаж байсан гадаадын иргэдийн томоохон сүлжээ илэрчээ.

Энэ оны нэгдүгээр сараас тавдугаар сарын хооронд Цагаачлалын албаныхан Цагаачлалын тухай хуулийг зөрчсөн 734 гадаадын иргэншилтэй хүргэлтийн жолооч болон 16 хүргэлтийн агентлагийн операторыг илрүүлсэн байна. Энэ нь өнгөрсөн бүтэн жилийн хугацаанд илэрсэн 67 тохиолдолтой харьцуулахад 11 дахин өссөн үзүүлэлт бөгөөд ухаалаг гар утсанд суурилсан хүргэлтийн үйлчилгээ өргөжин тэлэхийн хэрээр хууль бус хөдөлмөрийн зах зээл эрчимтэй өссөнийг харуулж байна.

Хууль зүйн яамны Цагаачлал, гадаад бодлогын газрын мэдээллээр, илэрсэн хүмүүсийн 61 хувь буюу 444 нь Вьетнамын иргэн байсан. Харин 22 хувь буюу 164 нь Хятадын, 12 хувь буюу 86 нь Узбекистаны иргэн байжээ.

Баригдсан хүргэлтийн жолоочдын талаас илүү буюу 410 хүн нь Өмнөд Солонгосын 96 их, дээд сургуульд суралцаж буй олон улсын оюутны (D-2) визтэй байсан байна. Үүнээс гадна ажил хайгчийн (D-10) визтэй болон гадаадад оршин суугчдад олгодог (F-4) визтэй хүмүүс ч цөөнгүй байжээ.

Мөрдөн шалгалтаар хүргэлтийн аппликэйшний хэрэглэгчийн эрхийг гадаадын ажилчдад түрээслэн ашиглуулдаг зуучлагчдын хууль бус зах зээл өргөн хүрээнд үйл ажиллагаа явуулж байсныг тогтоосон байна. Тухайлбал, Сөүл хотод нэгэн агентлагийн эзэн хүргэлтийн аппликэйшний 67 хаягийг гадаадын ажилчдад түрээслүүлж, хүн бүрээс сар бүр 250 мянган вон буюу ойролцоогоор 180 ам.доллар авдаг байжээ.

Харин Инчон хотын өөр нэг зуучлагч нэг хаягийг долоо хоногт 70 мянган воноор түрээслүүлдэг байсан аж. Өмнөд Солонгосын томоохон хүргэлтийн аппликэйшнүүдэд бүртгүүлэхийн тулд хууль ёсны оршин суух эрх эсвэл ажиллах зөвшөөрөл шаарддаг тул бичиг баримтын зөрчилтэй гадаадын иргэд ийм төрлийн түрээсийн хаяг ашиглан ажиллаж байжээ.

Шалгалтын дүнд 68 гадаадын иргэнийг албадан гаргах эсвэл сайн дураар нутаг буцах шийдвэр гаргасан бол 643 хүнд нийт 1.63 тэрбум вон буюу ойролцоогоор 1.18 сая ам.долларын торгууль ногдуулжээ.

Цаашид ийм зөрчлийг таслан зогсоохын тулд Хууль зүйн яам томоохон хүргэлтийн платформуудад хэрэглэгчийн мэдээллийг баталгаажуулах журмаар царай таних технологийг заавал нэвтрүүлэхийг албан ёсоор зөвлөсөн байна.