Дундговь аймгийн ЗДТГ БНСУ-ын Гёнги аймгийн Эмч нарын нийгэмлэгтэй байгуулсан санамж бичгийн хүрээнд тус улсын туршлагатай эмч нар 7 дугаар сарын 2–3-ны өдрүүдэд Дундговь аймгийн төвд ажиллаж, иргэдэд үнэ төлбөргүй үзлэг, оношилгоо хийнэ.
Энэ удаагийн үзлэг, оношилгоонд дотор, мэдрэл, шүд, мэс засал, арьс, гоо заслын чиглэлүүдээс гадна хөх, бамбай булчирхайн эхо, эмэгтэйчүүд, хүүхэд, гэмтэл, уламжлалт эмчилгээний үзлэгүүд багтаж байгаа бөгөөд иргэдэд эрүүл мэндийн зөвлөгөө, мэдээлэл мөн хүргэнэ. Үзлэгийг Дундговь аймгийн Нэгдсэн эмнэлгийн амбулаторийн тасагт зохион байгуулж, 7 дугаар сарын 2, 3-ны өдрүүдэд 09:00-11:00 цагт цахим бүртгэл хийж, 09:00–18:00 цагийн хооронд үргэлжлүүлэн явуулахаар төлөвлөжээ.
Тус сайн үйлсийн аян нь хоёр дахь жилдээ хэрэгжиж байгаа бөгөөд өнгөрсөн онд давхардсан тоогоор 3000 гаруй иргэн хамрагджээ. Мөн өмнөх жилийн үйл ажиллагааны хүрээнд цээжний түлэгдэлтэй болон хурууны наалдацтай хоёр хүүхдийг БНСУ-д 100 хувийн зардлаар хагалгаанд оруулан эмчилж, эх барих, эмэгтэйчүүдийн чиглэлийн хоёр эмчийг богино хугацааны сургалтад хамруулан мэргэжлийн ур чадварыг нь дээшлүүлсэн байна.
Эдгээр ажил нь Дундговь аймгийн Нэгдсэн эмнэлгийн үйл ажиллагааг сайжруулахад хувь нэмэр оруулж, иргэдийн эрүүл мэндийг дэмжих чухал ач холбогдолтой ажил болсон байна. Цаашид энэхүү хамтын ажиллагаагаар дамжуулан иргэдэд урьдчилан сэргийлэх үзлэг, оношилгоог тогтмол хүргэхийн зэрэгцээ хоёр орны эрүүл мэндийн салбарын хамтын ажиллагааг өргөжүүлэхэд чиглэж байгааг хамтран ажиллаж буй хоёр тал онцолжээ.
Сэтгэгдэл бичих