ОХУ шатахууны хомсдолоо шийдвэрлэхийн тулд Энэтхэгээс далайн тээврээр бензин импортлох гэж байгааг албаны эх сурвалжууд мэдээлжээ. Тус улсын 11 цагийн бүс дагуу хомсдол нүүрлэж, шатахуун түгээх станцуудын гадаа урт дараалал үүсэх болсон. Үүнийг дагалдаад бензиний үнэ ч өсөөд байгаа юм. Кремлийн мэдэгдсэнээр ОХУ өөр бусад улстай ч импортын асуудлыг хэлэлцэж байгаа аж.
Эх сурвалжийн мэдээлснээр, Энэтхэгээс дор хаяж 60 мянган тонн бензин импортолж байгаа бололтой. Мөн өөр нэгэн эх сурвалжийн мэдээлснээр, тус бүртээ 30 мянга, 40 мянган тонн бензин ачсан хоёр танкер замдаа гарсан байж магадгүй. Энэтхэгийн чухам аль компаниас шатахуун нийлүүлж байгаа нь тодорхойгүй байна.
ОХУ нийтдээ 400 мянган тонн бензинийг Беларусь тэргүүтэй янз бүрийн улсаас импортлохоор төлөвлөсөн гэх мэдээлэл байна. Беларусийн хувьд аль эртнээс Орос руу шатахуун нийлүүлээд эхэлсэн байгаа улс. Тус улс зургадугаар сарын эхний хагаст Орос руу төмөр замын тээврээр 70 мянга гаруй тонн бензин нийлүүлжээ. Энэ нь тавдугаар сарын эхний хагастай харьцуулахад бараг гурав дахин өссөн үзүүлэлт аж.
ОХУ-д зуны улиралд шатахууны эрэлт өндөр байдаг бөгөөд өдөрт дор хаяж 110 мянган тонн бензин хэрэглэдэг. Гэтэл энэ цаг үед Украины цохилтуудаас болж газрын тос боловсруулах үйлдвэрүүд болон бусад дэд бүтцийн ажиллагаа доголдож, шатахууны хомсдол нүүрлэсэн гэдгийг ерөнхийлөгч Путин албан ёсоор хүлээн зөвшөөрсөн юм.
ЭХ СУРВАЛЖ: REUTERS
Сэтгэгдэл бичих