Намайг Батдоржийн Баяржавхлан гэдэг. Жирийн нэг эмэгтэй.
Хөдөө, орон нутгийг зорин ажиллах шийдвэрт “Аавынхаа дэргэд төрийн ажил сураад ав” гэсэн аавын минь үг хамгийн их нөлөөлсөн. Анхандаа түр хугацаанд ажиллана даа гэж бодож явсан. Нэг мэдэхэд нутаг усандаа дасаж, уул ус, цэвэр агаар, амар тайван орчинд сэтгэлээ өгчээ.
Миний амьдралд хоёр “дүр” бий. Нэг нь 18 жил ажиллаж буй газрын албаны мэргэжилтэн, нөгөө нь яруу найрагч. Энэ хоёр зам миний амьдралыг тэнцвэржүүлж, урагшлуулж байдаг хэмээн бодохоор бахархалтай санагддаг. Нутагтаа үлдэх сонголт одоо насан туршийн минь шийдвэр болсон.
Зарим хүн газрын албаны мэргэжилтнийг зөвхөн газар олгодог хүн гэж ойлгодог. Үнэн хэрэгтээ бид газар нутгийг зөв зохистой зохион байгуулах, дахин төлөвлөлт хийх, газрын төлөв байдал, чанарт хяналт тавих, иргэдэд хуулиар олгогдсон эрхээ хэрэгжүүлэхэд нь дэмжлэг үзүүлэх зэрэг хариуцлагатай үүргийг өдөр тутам гүйцэтгэдэг.
Мэдээж энэ замд шантрах үе байсан. Гэвч хамт олон, аав ээжийнхээ итгэлийг алдахгүйг хичээн, салбарынхаа хөгжил дэвшилд гар бие оролцож, олон чухал үйл явдлын гэрч болж, орон нутагтаа сайхан ажиллаж, амьдарч явна.
Завхан аймгийн Газрын харилцаа, барилга, хот байгуулалтын газрын мэргэжилтэн Батдоржийн Баяржавхлан
Сэтгэгдэл бичих