Ирэх таван жилийн хугацаанд дэлхийн агаарын дундаж хэм түүхэн дээд түвшинд ойртох төлөвтэй байгаа бөгөөд Арктикт бусад нутгаас илүү хурдацтай дулаарах төлөвтэй байгааг НҮБ-ын Дэлхийн цаг уурын байгууллага болон Их Британийн Цаг уурын албаны хамтарсан тайланд дурджээ.
Мөн дэлхийн гадаргын жилийн дундаж температур аж үйлдвэржилтийн өмнөх үе болох 1850-1900 оны түвшнээс 1.3-1.9 хэмээр өндөр байх төлөвтэй байна.
Түүнээс гадна, 2026-2030 оны хоорондох нэг жилд дэлхийн агаарын дундаж хэм 2024 онд тогтоосон хамгийн халуун жилийн дээд үзүүлэлтээс давах магадлалтай байгаа ажээ. 2024 онд дэлхийн температур анх удаа аж үйлдвэржилтийн өмнөх үеийн түвшнээс 1.5 хэмээр давсан байна.
Түүнчлэн, ойрын таван жилд дэлхийн хойд хагас бөмбөрцгийн Арктикийн бүст өвлийн температур дэлхийн дунджаас 3.5 дахин хурдан нэмэгдэж, 1991-2020 оны суурь үзүүлэлтээс ойролцоогоор 2.8 хэмээр давна гэдгийг тайланд онцолжээ.
Мөн энэ оны өвөл хүчтэй “Эль-Ниньо” үзэгдэл дэгдэж, 2027 он хүртэл үргэлжлэх төлөвтэй байгаа нь Номхон далайн усны хэмийг нэмэгдүүлснээр дэлхийн агаарын хэмийг шинэ дээд түвшинд хүргэж болзошгүй байна.
Сэтгэгдэл бичих