Монгол Улсын Боловсролын сайдын орон тооны бус зөвлөх Д.Тэрбишдагва, Боловсролын ерөнхий газрын дарга, профессор Х.Тамир, Монгол-Германы хамтарсан ашигт малтмал, технологийн их сургуулийн ректор Б.Батцэнгэл болон албаны бусад төлөөлөгчид ХБНГУ-ын Саксони муж улсад ажиллаж, инженер техникийн ажилтан бэлтгэх чиглэлээр уулзалт, хэлэлцээр хийж байна.
Уулзалтын үеэр Саксони муж улсын Шинжлэх ухаан, соёл, аялал жуулчлалын яам болон тус мужийн таван их сургуулийн удирдлагуудтай уулзсаныг Боловсролын яамны мэдээлэв. Талууд Монгол Улсын аж үйлдвэржилт, дижитал шилжилт, ногоон хөгжил, дэд бүтцийн шинэчлэлийн бодлоготой уялдуулан олон улсын түвшний инженер, техникийн мэргэжилтэн бэлтгэх боломжийн талаар санал солилцсон байна.
Тус хөтөлбөр нь Монгол-Германы боловсролын хамтын ажиллагааны дараагийн 100 жилийн шинэ стратегийн эхлэл болох ач холбогдолтойг талууд онцлов.
Уулзалтын үеэр Саксони муж улсын Шинжлэх ухаан, соёл, аялал жуулчлалын яамны Дээд боловсролын газрын дарга Уолтер Кухме, “Монгол Улс бол боловсролын хамтын ажиллагааны хамгийн чухал түншүүдийн нэг” хэмээн онцолж, инженер техникийн чиглэлээр суралцах өргөн боломж байгааг илэрхийлжээ. Мөн Дрездэн хотын HTW Хэрэглээний шинжлэх ухааны сургуулиас механик инженерийн бакалаврын хөтөлбөрт монгол оюутнуудыг ирэх хичээлийн жилээс эхлэн элсүүлэх бүрэн боломжтойг мэдэгдэж, урт хугацааны хамтын ажиллагааг хөгжүүлэх саналыг илэрхийллээ.
Талууд Монгол-Германы боловсролын хамтын ажиллагааны 100 жилийн ойг тохиолдуулан 2026 онд эхний 100 оюутныг хамтарсан инженерийн хөтөлбөрт элсүүлэх асуудлыг хэлэлцэж байгаа бөгөөд энэхүү санаачилга нь хоёр улсын боловсрол, технологи, инновац, үйлдвэрлэлийн хамтын ажиллагааны шинэ үеийг эхлүүлэх чухал алхам болно гэж үзэж байгаа ажээ.
Сэтгэгдэл бичих