Геополитикийн өндөр ач холбогдолтой айлчлалууд идэвхтэй үргэлжилсээр байна. Хятадын дарга Ши Жиньпин айлчлалын цувааг үргэлжлүүлж, ирэх долоо хоногт юм уу зургадугаар сарын эхээр Хойд Солонгост айлчилж магадгүй байна. Өмнөд Солонгосын мэдээллийн агентлагийн мэдээлснээр, Ши Жиньпин Хойд Солонгосын удирдагч Ким Жон Ун болон АНУ-ын ерөнхийлөгч Дональд Трамп нарын хооронд зуучлагчийн үүрэг гүйцэтгэхийг оролдож магадгүй. Ши Жиньпин өнгөрсөн долоо хоногт Трампыг эх орондоо хүлээн авсан билээ.
Хятадын аюулгүй байдлын алба болон өөр бусад агентлагийн зарим албан тушаалтан саяхан Пёньянд айлчилсан аж.
Трамп анхны бүрэн эрхийнхээ хугацаанд Хойд Солонгосын цөмийн хөтөлбөрийн хүрээнд Ким Жон Унтай гурван удаа уулзсан байдаг. Хоёр дахь бүрэн эрхийн хугацаагаа эхлүүлснийхээ дараа тэр Ким Жон Унтай сайн харилцаатай байсан гэдгээ онцлоод, түүнтэй дахин уулзахад бэлэн гэжээ.
Хойд Солонгос, Хятадын хоорондох харилцаа холбоо нь Солонгосын хойгийн энх тайван, тогтвортой байдалд хувь нэмэр оруулна гэдэгт итгэж буйгаа Өмнөд Солонгосын Гадаад хэргийн яам мэдэгджээ. Мөн Хятад улс тодорхой үүрэг гүйцэтгэнэ гэж найдаж байгаагаа илэрхийлсэн байна.
ЭХ СУРВАЛЖ: REUTERS
Сэтгэгдэл бичих