Дүүжин замын тээврийн ашиглалтыг хариуцах “Улаанбаатар кабель кар” ОНӨТҮГ-ыг(Орон Нутгийн Өмчит Төсвийн Үйлдвэрийн Газар) өнгөрсөн 2025 онд НИТХ-аас байгуулсан байдаг. НЗД-ын харьяанд байдаг тус газрын зохион байгуулалтын хэлбэрийг өөрчлөх, дүрмийг шинэчлэн батлах асуудлыг ирэх долоо хоногт болох НИТХ-аар хэлэлцэж шийдвэрлэхээр болжээ.
“Улаанбаатар кабель кар” ОНӨТҮГ нь нийтийн тээврийн шинэ төрөл болох дүүжин замын тээврийн үйл ажиллагааг олон улсын стандартын дагуу зохион байгуулах бөгөөд нийт 57 ажилтантайгаар, 3 ээлжийн горимоор тасралтгүй ажиллуулах бүтэцтэй байх өөрчлөлтийг оруулахаар төлөвлөжээ. Үүнээс өдөрт зорчигч тээвэрлэлтийн үйлчилгээ, шөнийн цагаар засвар үйлчилгээ, техникийн хяналтыг хэрэгжүүлэх байдлаар хүний нөөцийг хуваарилах гэнэ.
Дүүжин тээвэр нь цагт 2,320 зорчигч тээвэрлэх боломжтой бөгөөд өдөрт 37 мянга гаруй, жилд 13.5 сая хүртэл зорчигч үйлчлүүлэх хүчин чадалтай гэж тооцоолжээ. Тарифыг 3,000 төгрөгөөр тооцвол, 2030 оноос ашигтай ажиллах санхүү, эдийн засгийн тооцоог гаргасан байна.
Харин нийслэлийн энэ оны төсвөөс “Улаанбаатар кабель кар” ОНӨТҮГ-ын үйл ажиллагааны зардалд ₮2.3 тэрбумыг төсөвлөжээ.
Франц улсын Засгийн газрын 316 тэрбум төгрөгтэй тэнцэх хэмжээний еврог 40 жилийн хугацаанд эргэн төлөх нөхцөлтэй нэн хөнгөлөлттэй зээлийн хөрөнгөөр Яармаг, Арцат-Хархорин, Өнөр хороолол чиглэлд дүүжин тээврийг явуулахаар "Пома" групп ажиллаж байгаа бөгөөд энэ оны төгсгөлд ашиглалтад оруулна гэж мэдэгдээд байгаа билээ.
Сэтгэгдэл бичих