УИХ-ын гишүүн Х.Баасанжаргал УИХ-ын чуулганы нэгдсэн хуралдааны үеэр ардчилал нуран унаж байгааг харж байна хэмээн хэллээ. Тэрбээр Ерөнхийлөгчийн санаачилсан УИХ-ын гишүүнийг эгүүлэн татах хуулийн төслийг хэлэлцэх эсэхийг хэлэлцэх үеэр ийнхүү байр сууриа илэрхийлсэн юм.
Тэрбээр "Ардчилал нуран унаж байгааг бид бүгд нүдээрээ харж байна. Ямар нөхцөлд байгаагаа хүлээн зөвшөөрцгөөе л дөө. Яагаад бүгд худлаа дүр эсгээд байгаа юм бэ. Төрийн эрх мэдлийг шууд булааж авахаа больсон. Яг ийм аргаар нэг нэгээр нь ямх ямхаар нь ингэж сулруулдаг. Ийм орны жишээ бид мэднэ шүү дээ. Турк, ОХУ гээд бид мэднэ. Гэхдээ үүнд Монгол Улсын Үндэсний аюулгүй байдлын зөвлөл тэр чигтээ оролцож байгаа нь үнэхээр харамсалтай байна. Тэр тундаа хуульчид оролцож байгаад чин сэтгэлээсээ харамсаж байна. Хурлын тэмдэглэлд үлдээх ёстой.
Бид энэ хуулийг хэлэлцэж эхэлснээр хожим нь Ерөнхийлөгч ямар асуудлаар, ямар хүрээнд хэрхэн дур зоргоороо аашлахыг таашгүй боллоо
Хожмын Үндсэн хууль судлаач, Засаглалын чиглэлээр ажиллах иргэний нийгмийн байгууллагууд, сэтгүүлчдэд зориулаад хэдэн асуултыг үлдээе. Би өмнө нь энд сууж байгаа таван хүний 2 нь төрийн тусгай албан хаагч, 3 нь улс төрийн албан тушаалтан байна гээд асуултаа хил хязгаарыг гаргасан. Хоёроос нь хуулийн, гурваас нь улс төрийн асуулт асууна гэсэн. Харамсалтай нь та бүхэн цэвэр улс төрийн байр суурь илэрхийлсэн. Гэхдээ та нар өөрсдөө хил хязгаараа давчихлаа.
Хожмын Үндсэн хууль судлаачид энэ ажлын хэсэг өөрсдөө ёс зүйн шаардлага хангасан уу гэдгийг харж үзээрэй. Тэр дундаа ҮАБЗ, ҮАБЗ-ийн хоёр албан тушаалтан институц хоорондыг зохицуулах ёстой хүмүүс нэг талд нь гараад ардчиллын дархлааг сулруулаад сууж байгаа нь судлаачийн ёс зүйг давсан уу. Улс төрийн намаас татгалздаг ард түмний эв нэгдлийг илэрхийлэх хүний ажлын алба тэр чигээрээ нэг намынх байж болох уу. Ерөнхийлөгчийн хууль санаачлах эрх нь хэмжээ хязгааргүй байж болох уу. Дүгнэлт хийгээрэй. Үндсэн хууль УИХ-ын тухай хууль хоёр зөрчилдсөн учир ямар нэг хил хязгааргүй, парламент руугаа халдаж байгаа нь зөв үү. Бид энэ хуулийг хэлэлцэж эхэлснээр хожим нь Ерөнхийлөгч ямар асуудлаар, ямар хүрээнд хэрхэн дур зоргоороо аашлахыг таашгүй боллоо. Тодорхой хэмжээнд хил хязгаарт барьдаг байсан нь өнөөдрөөр дуусгавар боллоо. Эрх мэдлийн хяналт тэнцэл, өргөн барьсан процесс нөлөөлсөн үү.
Өнгөрсөн 30 жилийн хугацаанд алдаа дутагдлыг энэ удаагийн сонгогдсон 126 гишүүн тэр дундаа 81 гишүүнээс нэхэж байгаад та бүхэнд баярлалаа. Өнгөрсөн 30 жил та бүхэн ёс зүйн өндөрлөгт байсан бол өнөөдөр бидний амьдрал ийм гунигтай байх ёсгүй байлаа. Та нар үүргээ биелүүлсэн үү. Намайг 1-р ангид байхад л улс төрд байсан ах нар өнөөдөр сууж байна шдэ. Тэгээд өнөөдөр ийм юм яриад биднээс ёс зүй нэхэж байгаадаа ичээч. Та нар бид нарыг утсан хүүхэлдэй болно гэж бодсон, бид тэгээгүй, бид та нарын алдаа дутагдлын хажуугаар дуугүй өнгөрөхгүй байгаа та нарыг нойргүй хонуулж байна. Тиймээс бидэнд зориулж ирсэн хууль. Нэг голын усанд хоёр удаа орж болдоггүй" гэсэн юм.
Сэтгэгдэл бичих