Хөл бөмбөгийн дэлхийн аварга шалгаруулах тэмцээний финалын тоглолтын тасалбарын үнэ 10 990 ам.долларт хүрсэн байна.
Энэ нь өмнөх финалын тоглолтуудынхтай харьцуулахад бараг 7 дахин их үнэтэй байгаа тул хөгжөөн дэмжигчдийн дунд өргөн хэмжээний хэлэлцүүлэг явагдахад хүргэлээ. Учир нь, тэмцээнийг зохион байгуулагч АНУ, Канад, Мексикийн зүгээс мэдэгдэхдээ, финалын тоглолтын тасалбарын үнэ 1550 ам.доллароос хэтрэхгүй гэж байв. Гэтэл өнгөрсөн оны 12 дугаар сард хөгжөөн дэмжигчдийн клубүүдийн зарим гишүүн 8680 ам.доллароор тасалбар худалдан авчээ.
Ташрамд дурдахад, 2022 онд Катарт болсон ДАШТ-ий үеэр билетийн хамгийн дээд үнэ 1604 ам.долларт хүрч байв. Гэтэл саяхан болсон нээлттэй худалдааны явцад 12 дугаар сарынхтай харьцуулахад үнэ 38 хувиар өсөж, 1 дүгээр ангиллын тасалбарын үнэ 10990 ам.доллар, 2 дугаар ангиллынх 7380 ам.доллар, 3 дугаар ангиллынх 5785 ам.долларт хүрсэн байна.
Харин ФИФА-гийн зүгээс худалдаанд гаргах тасалбарын тоог мэдээлэхгүй байгаа учраас борлуулалтын нийт дүнг тодорхойлох боломжгүй байгаа юм. Үүний сацуу хүчтэй багуудын тоглолт, ялангуяа плей-оффын тоглолтуудын тасалбарын үнэ огцом өссөнийг ажиглагчид онцолж байна. Энэ нь хөгжөөн дэмжигчдийн дургүйцлийг төрүүлж байгаа юм.
ФИФА өнгөрсөн оны 12 дугаар сард 60 ам.доллароор цөөн тооны тасалбар зарсан юм.
Сануулан дурдахад, хөл бөмбөгийн ДАШТ зургаадугаар сарын 11-нд эхэлнэ.
Сэтгэгдэл бичих