АНУ-ын технологийн салбарын тэргүүлэгч “Microsoft” корпорац хиймэл оюун ухаан болон үүлэн тооцооллын дэд бүтцийг бэхжүүлэх зорилгоор Япон улсад 1.6 их наяд иен буюу 10 тэрбум ам.долларын хөрөнгө оруулахаар болсноо баасан гарагт мэдэгджээ.
Тус корпорацын орлогч дарга бөгөөд ерөнхийлөгч Брэд Смит Токио хотноо Японы Ерөнхий сайд Такаичи Санаэтэй уулзах үеэрээ хөрөнгө оруулалтын төлөвлөгөөг танилцуулсан байна. Тодруулбал, “Microsoft” корпорац Японы “SoftBank” групп болон интернэт үйлчилгээ үзүүлэгч “Sakura Internet” компанитай хамтран ажиллах бөгөөд уг төсөл 2026 оны эхнээс 2029 оныг дуустал хэрэгжих ажээ.
"Бид Японы эдийн засагт шаардлагатай дэмжлэгийг үзүүлж чадна" хэмээн Брэд Смит уулзалтын үеэр мэдэгджээ.
“Microsoft” компани хиймэл оюуны хэрэглээнд нэн шаардлагатай өгөгдлийн төвүүдээ шинэчлэх, мөн үүлэн тооцооллын хүчин чадлыг бэхжүүлэх зэргээр Япон улсад хоёр жилийн хугацаанд 2.9 тэрбум ам.долларын хөрөнгө оруулах төлөвлөгөөгөө 2024 онд танилцуулж байсан юм.
Сэтгэгдэл бичих