БНХАУ-ын Агаар сансрын газрын удирдах ажилтан авлигын хэрэгт буруутгагдан цаазын ял сонслоо

Хятадын шүүх 2026.03.25-ны өдөр Хятадын Нисэхийн аж үйлдвэрийн корпорацын (AVIC) ТУЗ-ийн дарга асан Тан Руйсонд авлигын хэргээр цаазаар авах ял оноожээ. AVIC нь Хятадын цэргийн нисэх онгоц, нисгэгчгүй нисэх төхөөрөмжийг үйлдвэрлэдэг байгууллага юм. Энэ бол Хятадын цэрэг-аж үйлдвэрийн салбар дахь авлигын эсрэг өргөн хүрээний кампанит ажлын нэг хэсэг ажээ.

Тус улсын зүүн хойд Ляонин мужийн шүүхээс сансар, батлан хамгаалахын салбарын хуучин удирдах албан тушаалтан Тан Руйсонг хөрөнгө завших, хахууль авах, албаны мэдээлэл задруулсан хэрэгт буруутай нь тогтоогдсон талаар мэдээлсэн байна.

Шүүхийн анхан шатны шийдвэрт дурдсанаар, Тан нь сансар судлалын салбарт 30 жилийн турш албан тушаал хашихдаа 700 сая гаруй юань (ойролцоогоор 101 сая ам.доллар) хууль бусаар олсон байна. Шүүхээс Тангийн төрд ажиллах эрхийг бүх насаар нь хасаж, бүх өмчийг нь хураах шийдвэр гаргасан байна. Тэрээр гэм буруугаа хүлээн зөвшөөрч, гэмшсэн гэж мэдэгджээ.

Авлигын хэрэгт холбогдсон Тан Руйсонг 2025 оны хоёрдугаар сард эрх баригч Коммунист намаас хөөсөн байна. Түүнийг цэргийн салбарыг ашиглан амьдарч, их хэмжээний хахууль авсан гэж Хятадын авлигатай тэмцэх байгууллага тухайн үед мэдэгдэж байв.

Ерөнхийлөгч Ши Жиньпин Хятадын цэргийн салбарт олон жил бугшсан авлигын эсрэг цэвэрлэгээг эхлүүлсэн бөгөөд энэ хүрээнд дээд түвшний генералууд, ахлах албан тушаалтнууд, батлан хамгаалахын сайд асан болон салбарын удирдлагуудыг огцруулан шалгаж, эрүүгийн хариуцлагад татсан байна.

Энэ оны хоёрдугаар сард батлан хамгаалах салбартай холбоотой 3 хууль тогтоогчийг парламент дахь албан тушаалаас нь чөлөөлсөн. Мөн Тангийн залгамжлагч Жөү Шиньмин, цөмийн зэвсгийн судлаач Лю Цанли, Хятадын Үндэсний цөмийн корпорацийн ерөнхий инженер Ло Ци нарыг албан тушаалаас нь огцруулжээ.

Эх сурвалж: https://www.straitstimes.com