Төвлөрлийг сааруулж, түгжрэлийг бууруулах “20 минутын хот” бодлогын хүрээнд Баянхошуу, Шархад төвүүдэд ногоон орон сууцны төслийг хэрэгжүүлж буй.
Азийн хөгжлийн банк, Уур амьсгалын ногоон сан болон Өндөр технологийн сангийн эх үүсвэрээс санхүүжүүлж буй энэхүү төсөл нь 3 хэсэгтэй. Нэгдүгээр бүрэлдэхүүний хүрээнд Баянхошуу, Шархад дэд төвүүдэд нам давхрын 800 өрхийн орон сууц бүхий эко хотхон хорооллыг барьж байгуулах ба хоёрдугаар ээлжинд нь “Эко хороолол ба орлогод нийцсэн орон сууцны сан”-г байгуулах юм. Тодруулбал, 4200 өрхийн ногоон орон сууцийг дэд төвүүдэд барьж байгуулахаар төлөвлөсөн. Гуравдугаарт, ногоон барилга, эко хорооллын норм, стандартыг тодорхойлох, салбарын чадавхийг бэхжүүлэх зэрэг зорилготой.
Энэхүү төслийн танилцуулгыг Нийслэлийн орон сууцны бодлогын газрын Орон сууцны дэд бүтцийн хэлтсийн дарга Г.Ганхүү Эдийн засаг, төсөв, хөрөнгө оруулалтын хорооны гишүүдэд танилцууллаа.
Баянхошуу дэд төвийн13 блок 462 өрхийн орон сууцны барилга угсралтын ажил 60 хувьтай хэрэгжиж байна. Эхний ээлжийн 110 айлын орон сууцыг энэ сард Улсын комисст хүлээлгэн өгч байнгын ашиглалтад оруулж байгааг дурдлаа. Шархад дэд төвийн 10 блок 338 өрхийн орон сууцны барилга угсралтын ажил 60 хувьтай хэрэгжиж байгаа бөгөөд эхний ээлжийн 110 айлын орон сууцыг энэ сард мөн Улсын комисст хүлээлгэн өгч байнгын ашиглалтад оруулах гэнэ.
Төслийн хоёрдугаар бүрэлдэхүүн хэсгийн хэрэгжилтийг одоо баригдаж буй 800 айлын орон сууцаар Баянхошуу болон Шархад дэд төвүүдэд 33.8 орчим га талбарыг чөлөөлж 4200 айлын орон сууцны төслийг 2025-2030 онд хэрэгжүүлнэ. Энэхүү талбарын дундаж нягтрал 370 хүн/га байх ба 5-16 давхар ногоон орон сууц барихаар төлөвлөж байгааг НИТХ-ын ээлжит V хуралдаанаар хэлэлцүүлэхийг дэмжлээ.
Сэтгэгдэл бичих