Боловсролын салбарт тэгш хамруулах боловсролын чиглэлээр түгээмэл ашигладаг зарим нэр томьёог гадаад хэлээрх сурвалжаас монгол хэл рүү орчуулан салбарын хэмжээнд нэгдсэн ойлголттой болж, монгол хэлнээ зөв орчуулж, ашиглах зорилгоор санал авах уулзалтыг өчигдөр зохион байгууллаа.
Монгол Улсын “Ерөнхий боловсролын сургуулийн багш нарт зориулсан тэгш хамруулах боловсролын цахим платформ бий болгох” төслийг Боловсролын ерөнхий газар, “Адина-тэгш боломж” ТББ хамтран хоёр жилийн хугацаанд хэрэгжүүлж байгаа юм. Төслийн хүрээнд хөгжлийн бэрхшээлтэй хүүхэдтэй ажиллах арга зүйн шинж чиглэлээр аутизмын хүрээний эмгэг, тулгуур хөдөлгөөн, хэл ярианы бэрхшээл, анхаарлын дутмагшил, хэт хөдөлгөөнтөх эмгэг, оюун ухаан, хараа, сонсгол, суралцахуйн бэрхшээл, дауны хам шинж чиглэлээр есөн модулийг боловсруулсан байна.
Уулзалтад Боловсролын ерөнхий газар, Хөгжлийн бэрхшээлтэй хүний хөгжлийн ерөнхий газар болон төрийн болон төрийн бус байгууллагын төлөөлөл оролцож, санал солилцжээ.
Уг төсөл нь Боловсролын яам, Люксембургийн их вант улсын ГХЯ, ПАДЕМ олон улсын байгууллагын санхүүжилттэй юм.
Сэтгэгдэл бичих