АНЭУ-ын Аль-Айн хотод шатрын насанд хүрэгчдийн Ази тивийн аварга шалгаруулах тэмцээн маргааш эхэлнэ.
10 хоног үргэлжлэх тус тэмцээнд 34 орны нийт 262 тамирчин оролцох аж. Харин манай улсаас Үндэсний шигшээ багийн дасгалжуулагч С.Билгүүн, С.Ган-Од нарын удирдлага дор эмэгтэйчүүдийн ангилалд их мастер Б.Мөнгөнтуул, Т.Мөнхзул, Ү.Үүрийнтуяа, ФИДЕ дэд мастер Б.Мөнгөнзул, эрэгтэйчүүдэд Олон улсын мастер С.Ган-Эрдэнэ, Г.Амартүвшин, ФИДЕ мастер Н.Содбилэгт нар өрсөлдөхөөр Эмиратыг зорилоо. Үүнээс гадна эмэгтэйчүүдийн ангилалд их мастер Д.Номин-Эрдэнэ, Азийн 3.3 бүсийн тэмцээний мөнгөн медальт, ФИДЕ мастер Э.Энхрий, ФИДЕ дэд мастер Э.Эмүжин, Б.Буянхишиг, Ч.Нандинжигүүр, Х.Баясгалан, залуу тамирчин З.Нарансолонго, З.Наранзаяа, нээлттэй ангилалд ФИДЕ мастер С.Чингүүн, Г.Мөнхбаяр нар өрсөлдөх юм байна.
Тус тэмцээнд шатрын спортоор дэлхийд тэргүүлэгч Энэтхэг, БНХАУ, ОХУ (ОХУ Азийн шатрын холбоонд элссэн)-ын шатарчид оролцох тул өмнөх жилүүдээс илүү өрсөлдөөнтэй болох нь дамжиггүй. Дэлхийн цомын эрх олгох тус тэмцээнд их мастер 53, эмэгтэй их мастер 19, Олон улсын цолтой 228 шатарчин бүртгүүлжээ.
Монголын шатарчид тус тэмцээнээс нийт хоёр хүрэл медальтай бөгөөд 2019 онд Т.Мөнхзул, 2023 онд Б.Мөнгөнтуул нар шагналын тавцанд гарч байв.
Сэтгэгдэл бичих