Засгийн газраас өнгөрсөн оны арваннэгдүгээр сарын 15-наас эхлэн эрчим хүчний үнийг хэрэглээнээс нь хамааран 30-85 хувиар нэмэгдүүлж байгааг мэдэгдсэн бол дулааны үнийг 2025 оны тавдугаар сард нэмэгдүүлэхээ мэдэгдээд байсан. Харин олон нийтийн зүгээс үнэ нэмэх шийдвэрт эсрэг байр суурьтай байгаагаа илэрхийлж байв. Улмаар өнгөрсөн долоо хоногийн /2025.03.12/ Засгийн газрын хуралдаанаас дулааны үнэ нэмэхийг түр хугацаанд хойшлуулсан гэдгийг мэдэгдээд байгаа. Тэгвэл тарифын шинэчлэлт хийгээгүйгээс тус салбарт ямар алдагдал үүсэх талаар холбогдох албаныхан дараах мэдээллийг өглөө.
ХЭРЭВ 118 ТЭРБУМ ТАТААСААР ОЛГОГДОХГҮЙ БОЛ ЭХ ҮҮСВЭРИЙН ДУТАГДАЛД ОРНО
Эрчим хүчний зохицуулах хорооны ажлын албаны дарга Б.БОЛОР-ЭРДЭНЭ:
-Мэдээж өртөгтэй хөрөнгө байгаагаас болоод эрчим хүчний салбар тодорхой хэмжээнд хөрөнгийн дутагдалд орно. Орж байгаа дутагдлаа өр, зээлээр санхүүжүүлэх, эсвэл татвар, нийгмийн даатгалын өр үүсгэж явах нөхцөл байдал үүснэ гэсэн үг. Дулааны эрчим хүчний тарифын хувьд 118 тэрбум төгрөгийн дутагдалд орох тооцоо гарсан. Хэрэв энэ дүн татаасаар олгогдохгүй бол эх үүсвэрийн дутагдалд орох, салбарын нөхцөл байдал хүндрэх, өр үүсээд явах эрсдэл тулгарна.
ТӨЛӨВЛӨСӨН ЗАРДЛАА БУУРУУЛАХ ХЭРЭГЦЭЭ ҮҮССЭН
ЭХЗХ-ны үнэ тарифын газрын дарга Б.ЭРДЭНЭБУЛГАН:
-Өмнө нь бол алдагдлыг өрөөр санхүүжүүлж явж байсан. Мөн хийх ёстой засвар үйлчилгээг хойшлуулах, ажлын эзлэхүүнүүдийг багасгах байдлаар ажиллаж ирсэн. Тэгэхээр ажлын эзлэхүүнийг багасгах, засвар шинэчлэлтийг багасгана гэдэг ямар үр дагавартай вэ гэхээр хуучирсан, насжилт өндөртэй тоног төхөөрөмжүүдээс шалтгаалсан гэнэтийн аваар, саатал гарах эрсдэлийг нэмж байгаа юм. Орлогын бууралттай холбоотойгоор тодорхой хэмжээний алдагдлыг салбар үүрээд явна. Мөн зардлаа төлөвлөснөөс бууруулах хэрэгцээ шаардлага үүсч байна.
Зардал бууруулна гэдэг бид засвар үйлчилгээний зардлаас гадна урт хугацаатай зээлийн төлбөрүүдийг графикаас хоцорч төлөх арга хэмжээ авахаас өөр аргагүйд хүрнэ.
Сэтгэгдэл бичих