Өмнөд Солонгосын ерөнхийлөгч Юн Сук Ёлыг огцруулах эсэх эцсийн шийдвэрийг тус улсын Үндсэн хуулийн цэц ойрын өдрүүдэд зарлах төлөвтэй байна. Тодорхой хугацааг хараахан зарлаагүй байгаа ч гэлээ энэ өдөр болзошгүй эмх замбараагүй байдлаас сэргийлж 14 мянга орчим цагдаагийн алба хаагч хамгаалалтад гарах ажээ. Энэ тоо нь дээд түвшний аюулгүй байдлын сэрэмжлүүлэг зарласан тохиолдолд улс даяар дайчилж болох нийт хүчний 60 хувь юм.
Цагдаагийн байгууллагаас өмнө нь 12 мянган алба хаагч байршуулна гэж мэдээлж байв. Гэхдээ томоохон хэмжээний цугларалт болох тул шүүх байгууллагууд руу халдлага үйлдэж магадгүй тул алба хаагчдын тоогоо нэмжээ. Энэ өдөр Үндсэн хуулийн цэцийн байранд эрүүгийн хэргийн цагдаагийн ажилтнуудыг байрлуулж, цагдаагийн тусгай хүчнийхэн мөн ойролцоо бэлэн байдалд байна. Мөн шүүх рүү дайрсан жагсагчдыг газар дээр нь баривчлана гэж мэдэгдлээ.
Үүнээс гадна аюулгүй байдлын арга хэмжээ болгож шүүхийн эргэн тойронд нислэгийн хориотой бүс тогтоогоод буй билээ. Хориотой бүсийг үл харгалзан хууль бусаар дрон зэргийг нисгэж магадгүй тул тухайн байрлалд дрон эсэргүүцэгч төхөөрөмжүүдийг байрлуулах болжээ.
Сургууль, метроны буудал, шатахуун түгээх станц, шүүхийн ойролцоох дөрвөн барилгын талбайн ажлыг тухайн өдөр зогсооно. Мөн зэргэлдээх 22 барилгын дээвэр лүү хэн ч гарах боломжгүй.
ЭХ СУРВАЛЖ: YONHAP
Сэтгэгдэл бичих