АНУ-ын ерөнхийлөгч Дональд Трамп, ОХУ-ын ерөнхийлөгч Владимир Путин нар ойрын өдрүүдэд утсаар ярьж, дайныг зогсоох гэрээний талаар хэлэлцэхээр болжээ.
АНУ-ын тусгай төлөөлөгч Стив Виткофф пүрэв гарагт Москва хотноо Путинтэй уулзсан.
Үүний дараа CNN-д өгсөн ярилцлагадаа тэрбээр “Энэ долоо хоногт хоёр ерөнхийлөгч утсаар ярилцаж, дайны асуудлаар хэлэлцэнэ. Бид Украинтай байнгын холбоотой байж, бүх саналаа хуваалцаж байгаа” гэжээ.
Өнгөрсөн долоо хоногт АНУ-аас 30 өдрийн гал зогсоох санал танилцуулсныг Украины тал дэмжсэн бөгөөд дараа нь ОХУ-д танилцуулсан. Путин уг саналыг дэмжиж байгаагаа илэрхийлсэн ч зарим нэг болзол тавьсан юм.
Гал зогсоох үйл явц удаашрах нь Оросын армид давуу байдал үүсгэж, Украиныг эзлэн түрэмгийлэх ажиллагаагаа үргэлжлүүлэх хугацааг өгнө гэж шинжээчид үзэж байна.
Ням гарагт Украины ерөнхийлөгч Володимир Зеленський "Сүүлийн долоо хоногт ОХУ Украины нутаг дэвсгэр рүү 1000 гаруй дрон, 1300 тэсрэг бөмбөг хаясан" гэж мэдэгдсэн.
Тэрбээр "Дайныг хурдан дуусгахыг хүсэж буй хүн ийм үйлдэл хийхгүй. Тиймээс бид хамтдаа ОХУ-д шахалт үзүүлж, түрэмгийллээ зогсоохыг албадах хэрэгтэй" хэмээн Телеграм хуудастаа бичсэн байна.
Эх сурвалж: The Guardian
Сэтгэгдэл бичих