Оросын хоёр нисгэгчгүй онгоц Лхагва гаригаас Пүрэв гаригт шилжих шөнө Молдавын нутаг дэвсгэрт дэлбэрчээ. Энэ талаар Молдавын ерөнхийлөгч Майя Санду мэдээлэл өгөхдөө "Ираны зохион бүтээсэн шахед нисгэгчгүй онгоцууд манай агаарын орон зайг зөрчсөн нь молдавчуудын амь насыг эрсдэлд оруулж байна. Оросын Украины эсрэг хийсэн дайн дахин Молдав руу нэвтэрлээ. ОХУ хил хязгаарыг үл хүндэтгэж, энгийн иргэд рүү дайрч, терроризмыг түгээж байна. Украинтай хийж буй энэ дайн гэмт хэргийн шинжэтэй" гэжээ.
Молдавын хилийн цагдаагийн газраас мэдээлснээр, ОХУ-ын арми Одесса муж дахь Украины Рени боомт руу довтлох үеэр нисгэгчгүй онгоцууд өмнөд нутгийн хөдөө тосгон руу унасан байна. Рени боомт нь Молдавын Гургулести хотоос ердөө есөн км зайд, Румыны Галати хотоос 26 км зайд оршдог.
Энэ үйл явдалтай холбоотойгоор Молдавын Гадаад хэргийн яам нийслэл Кишинев хот дахь Оросын дипломат төлөөлөгчийн газрын тэргүүнийг дуудаж, Молдавын үндэсний аюулгүй байдал болон иргэдэд ноцтой аюул учруулж буй хүлээн зөвшөөрөх боломжгүй зөрчлийг нь буруушаажээ. Мөн зөрчлийн бодит нотлох баримт болгон Оросын дипломатчид нисгэгчгүй онгоцны хэлтэрхийг үзүүлсэн байна.
Үүнтэй ижил төстэй агаарын орон зайн зөрчил Румын улсад мөн гарчээ. Тус улсын Үндэсний Батлан хамгаалах яам өнөөдөр мэдээлэл хийхдээ нөлөөллийн бүс байгаа ч материаллаг хохирол учраагүй гэжээ. Мөн Оросын халдлагыг олон улсын хуулийн хэм хэмжээтэй ноцтой зөрчилдөж буй үйлдэл гэв.
ЭХ СУРВАЛЖ: EURO NEWS
Сэтгэгдэл бичих