Орон сууц нийтийн аж ахуйн удирдах газар/ОСНААУГ/-ын ажилтан, албан хаагчид өнөөдөр /2025.02.13/цалингаа нэмүүлэх шаардлага тавин Сүхбаатарын талбайд жагслаа.
Ажилчдын хэлж байгаагаар шинээр ажилд орж байгаа хүний үндсэн цалин сарынх нь 900 мянган төгрөг бол олон жил ажилласан нь сарын 1.3 сая төгрөг орчим аж. Харин инженерийнх сарын цалин 1.3 саяас 1.6 сая төгрөг. Гар дээр авдаг цалин нь хаанаа ч хүрэлцдэггүй. Хоол авч идэх нь байтугай авсан цалингаа зээлээ төлөөд л дуусдаг. Үүнээс болж тус газар ажиллах хүчний хомсдолд орж эхэлсэн. Үлдсэн хүмүүс нь байхгүй хүмүүсийнхээ оронд нөхөж ажиллах замаар цаг наргүй ажилладаг.
Тохижилт үйлчилгээний компанийнхны сарын цалин 3.5 сая төгрөг. Өөрөөр хэлбэл, ТҮК-ийн ажилчдаас хүнд нөхцөлд ажилладаг байтлаа хамгийн бага цалин авч буй. Өдөр бүр бохиртой ноцолддог. Улаанбаатар хотын орон сууцны шугам сүлжээ нэлэнхүйдээ муудсан. Шугам сүлжээг шинэчлэх шаардлагатай байна гэхэд хөрөнгө мөнгө байхгүй гэдэг, эсвэл зун болохоор засварлана гэдэг. Түүнээс нь болж өдөр тутам ноцолддог бохирын шугамууд ч олон бий. Шөнө дөлөөр ч дуудагдаж ажиллах тохиолдол олон. Гэвч илүү цагийн хөлс авдаггүй.
Иймээсилүү цагийн хөлсөө цалин дээрээ нэмж бодуулж авдаг болох шаардлагыг тавьж буй юм байна.
Цалинг нь нэмэхгүй байгаа шалтгааныг тус газрын ажилтан мөн “Усны зохицуулах хороо, Эрчим хүчний зохицуулах хороо үнэ тарифыг барьж байгаагаас мөн болж байна. Эрчим хүчний салбарынхан эрчим хүчний үнийг нэмүүтээ дагуулаад цалингаа нэмсэн. Гэтэл бидний цалинг өсгөх боломжийг олгохгүй байна. Энэ асуудлыг яаралтай шийдэхгүй бол ОСНААУГ ажитллах хүчний хомсдолд орж байна” гэлээ.
Тус жагсаалыг ОСНААУГ-ын ажилчдын эрх ашгийг хамгаалах Үйлдвэрчний эвлэлийн холбооноос зохион байгуулав.
Г.ХОРОЛ
Сэтгэгдэл бичих