“DeepSeek”-ийн үүсгэн байгуулагч хэр баян бэ?
Ажлын хажуугаар хийх бизнес байдлаар хоёр жилийн өмнө анх эхэлсэн “DeepSeek” өдгөө үүсгэн байгуулагч Лян Вэньфэнийг дэлхийн хамгийн чинээлэг эрхмүүдийн нэг болгож чадсан болов уу? Хэнээс асуухаас хариулт нь шалтгаална.
$150 тэрбум ч хүрэх вий…
“DeepSeek” компанийн үнэлгээ одоогоор нэг тэрбум ам.доллароос 150 тэрбум ам.долларын хооронд байх боломжтой гэж хиймэл оюуны чиглэлээр мэргэшсэн долоон эксперт үзэж байна. Наанадаж 2-30 тэрбум ам.долларын хооронд үнэлэгдэнэ гэж тооцвол компанийнхаа 84 хувийг эзэмшдэг Лян Вэньфэн Азийн хамгийн чинээлэг технологийн магнатуудын нэг болох юм.
“Хамгийн даржнаар тооцооллоо ч “DeepSeek” хэдхэн саяын орлоготойгоор тэрбум давсан үнэлгээнд хялбархан хүрэх боломжтой. Цаашдын өсөлтийг нь дурдаад ч хэрэггүй биз ээ” хэмээн “Glasswing Ventures” венчур хөрөнгө оруулалтын үүсгэн байгуулагч, удирдах партнер Рудина Сесери өгүүлжээ.
“Anthropic”, “OpenAI” зэрэг төстэй компаниудад суурилан тооцвол “DeepSeek”-ийн зах зээлийн үнэлгээ багадаа нэг тэрбум ам.доллар гэж Рудина Сесери үзсэн байна. Харин “Sweat Free Telecom”-ийн үүсгэн байгуулагч Чанакя Рамдев илүү өөдрөгөөр төсөөлж, үнэлгээ нь “OpenAI”-ийн 300 тэрбум ам.долларын үнэлгээний ядаж хагастай тэнцэх ёстой гэсэн байна. Хэрэв үнэн бол Лян Вэньфэний хөрөнгө 126 тэрбум ам.доллар хүрч, “Nvidia”-ийн Женсен Хуаны хөрөнгөөс ч давах юм.
Өрсөлдөгчдийг нь харвал “Amazon”-ийн хөрөнгө оруулалттай “Anthropic” 60 тэрбум ам.доллар, Францын тэргүүлэгч “Mistral AI” зургаан тэрбум ам.доллар, БНХАУ-ын өөр нэг стартап “Zhipu AI” гурван тэрбум ам.доллароор тус тус үнэлэгдэж байна.
Бараг ганцхан шөнийн дотор “DeepSeek” хиймэл оюуны өртгийн талаарх “Wall Street”-ийн ойлголтыг эргүүлж, хиймэл оюун хөгжүүлэх өнөөгийн шилдэг технологиуд болон АНУ-ын давамгайлалд эргэлзээ төрүүлсэн юм. Үүний улмаас “Nvidia”-ийн үнэлгээ түүхэнд байгаагүй дүнгээр буурч, технологийн салбарын хамгийн чинээлэг эрхмүүдийн нийт хөрөнгө 108 тэрбум ам.доллароор хорогдож байлаа.
Энэ бүгд нь өөрийн хүчээр бизнесээ босгож өдийг хүрсэн Лян Вэньфэний мандан бадралын түүх болж байна.
Оргил өөд
Лян Вэньфэн 1985 онд БНХАУ-ын өмнөд хэсгийн Гуандун мужийн Жаньжян хотод төржээ. Тэрбээр Ханжоу хотын нэр хүндтэй Жөжяний их сургуулийг цахилгаан инженерийн мэргэжлээр төгссөний сацуу мэдээлэл, харилцаа холбооны инженерчлэлээр магистрын зэрэг хамгаалсан байна.
Лян Вэньфэн “DeepSeek”-ийг өөрийн хедж сан “High-Flyer Asset Management”-ийн хиймэл оюуны хэлтсээс салбарлуулах байдлаар 2023 онд анх байгуулжээ. Нэгэн үе 12 тэрбум ам.доллар удирдаж байсан тус санг Лян Вэньфэн их сургуульдаа хамт сурсан хоёр инженерийн хамт үүсгэн байгуулсан аж. Тэрбээр “DeepSeek”-ээс гадна “High-Flyer Asset Management”-ийн 51 хувь буюу 71 сая ам.доллартой тэнцэх хувь эзэмшдэг болохыг “Bloomberg”-ийн тэрбумтнуудын индексийн харьцуулсан шинжилгээ харуулж байна.
“DeepSeek”-ийг аль хэдийн олон зуун компани, мөн БНСУ, Австрали зэрэг улсын Засгийн газар аюулгүй байдлын үндэслэлээр хязгаарлаад байгаа юм. Хэдий тийм боловч БНХАУ дотроо “DeepSeek” технологийн компаниудын сонирхол, хөрөнгө оруулалтыг татах магадлал тун өндөр аж.
Сэтгэгдэл бичих