Аялал жуулчлалын мэргэжлийн холбооны ерөнхийлөгч Ц.Баатарсайхан өөрийн хүсэлтээр чөлөөлөгдөх хүсэлтээ өгч, түүний оронд "Лүүк Монголиа" компанийн захирал Т.Баттулга сонгогджээ. Аялал жуулчлалын мэргэжлийн холбоо 2025 оны нэгдүгээр сарын 2-ны өдрийн Удирдах зөвлөлийн хурлаар Ерөнхийлөгч Ц.Баатарсайханы өөрийн хүсэлтээр чөлөөлөгдөх хүсэлтийг хэлэлцэж санал хурааж чөлөөлсөн байна.
Хурлаар Тэргүүн дэд ерөнхийлөгчийн албан үүргийг хашиж байсан "Лүүк Монголиа" ХХК-ийн ерөнхий захирал Т.Баттулгыг ерөнхийлөгчид нэр дэвшүүлэн 100 хувийн саналаар дэмжин томилжээ.
Аялал жуулчлалын тухай хуулийг 25 жилийн дараа 2023 оны тавдугаар сарын 5-нд баталсан. Хуулийн нэг онцлох заалт нь энэ салбарт шинээр орж ирэх гэж байгаа гарааны компаниудыг дэмжиж, тусгай зөвшөөрөл шаардахаа больсон. Мөн төртэй хамтран ажиллах аялал жуулчлалын салбарын мэргэжлийн холбоог байгуулах тухай заалт юм.
Аялал жуулчлалын салбар олон холбоодтой бөгөөд хууль батлагдсанаар бүх холбоод нэгдэн, нэг том холбоо байгуулж ажиллах. Тэгж байж аялал жуулчлалын салбарын бодлогыг төртэй хамтран зангидаж, энэ салбарыг хөгжүүлнэ гэж хууль санаачлагчид онцолж, энэ заалтыг тусгасан билээ.
Аялал жуулчлалын мэргэжлийн холбоо 2023 онд 130 гишүүн байгууллагатай үйл ажиллагаагаа эхэлж байсан бол 2024 онд 378 гишүүн байгууллагатай болж өргөжин 2025 оны эхний сард 24 байгууллага шинээр гишүүн болж нийт гишүүн байгууллагуудын тоо 400 даваад байгаа аж.
Сэтгэгдэл бичих