БНХАУ-ын жишиг “CSI 300 Index” 1.8 хувиар өсөж, долоо хоногийн хамгийн өндөр өсөлт үзүүллээ.
БНХАУ орон нутгийн хамтын сангууд болон даатгалын компаниудын хувьцаанд оруулах хөрөнгө оруулалтын хэмжээг нэмэгдүүлэхээр болсноо мэдээллээ.
Хамтын сангууд ойрын гурван жилийн хугацаанд БНХАУ-ын компаниудад эзэмшиж буй хувьцаагаа жил бүр хамгийн багадаа 10 хувиар нэмэгдүүлэх ёстой болж байгаа аж. Мөн Төрийн өмчит даатгалын томоохон компаниуд 2025 оноос даатгалын хураамжаас олсон орлогынхоо 30 хувийг хувьцаанд хөрөнгө оруулдаг болох шаардлагатай болно гэж БНХАУ-ын Үнэт цаасны зохицуулах хорооны дарга Ву Чин мэдэгджээ.
Дээрх мэдэгдлийн дараа БНХАУ-ын жишиг “CSI 300 Index” 1.8 хувиар өсөж, долоо хоногийн хамгийн өндөр өсөлт үзүүлсэн бол “Hang Seng Index” 0.8 хувиар өссөн байна.
“Bank of East Asia”-ийн хөрөнгө оруулалтын Ахлах стратегич Жэйсон Чан “Энэхүү бодлого нь БНХАУ-ын хувьцаанд, ялангуяа ногдол ашгийн өгөөж өндөртэй Төрийн өмчит аж ахуйн нэгжүүдийн хувьцаанд маш ашигтай” гэж мэдэгджээ. Мөн тэрбээр "Даатгалын компаниуд ердийн үед орлогынхоо 15-20 хувийг хувьцаанд хөрөнгө оруулалт хийхэд зарцуулдаг бөгөөд энэ хэмжээг 30 хувь болгож нэмэгдүүлсэн нь үнэхээр гэнэтийн шийдвэр" болсныг тодотгосон байна.
Сэтгэгдэл бичих