Дональд Трампын мэдэгдлийн дараа “CSI 300 Index” таван өдөр үргэлжилсэн өсөлтөө алдав.
АНУ-ын Ерөнхийлөгч Дональд Трамп ирэх сараас БНХАУ-ын бүх импортын бараа, бүтээгдэхүүнд 10 хувийн татвар ногдуулж магадгүй гэж мэдэгдсэн байна. Тэрбээр Цагаан ордонд болсон арга хэмжээний үеэр “Мексик, Канадаар дамжуулан АНУ-д фентанил нийлүүлж байгаатай холбоотойгоор ирэх хоёрдугаар сарын нэгнээс БНХАУ-д 10 хувийн татвар ногдуулах талаар хэлэлцэж байна” гэж онцолжээ.
Дональд Трамп сонгуулийн кампанит ажлынхаа үеэр импортын бараа, бүтээгдэхүүний татварыг нэмэгдүүлж, тэр дундаа БНХАУ-ын бараа, бүтээгдэхүүнд 60 хүртэлх хувийн татвар ногдуулна гэж амлаж байсан юм. Тэрбээр мягмар гарагт БНХАУ-ын фентанил болон мансууруулах бодис үйлдвэрлэхэд ашигладаг химийн бодисын хууль бус худалдааг дурдаж, АНУ-д хилээ хамгаалахад нь тусалж чадахгүй бол Мексик, Канад улсад ч 25 хувийн татвар ногдуулна гэж мэдэгдлээ.
Энэхүү мэдэгдлийн дараа БНХАУ-ын Хөрөнгийн биржид уналт давамгайлж, “CSI 300 Index” сүүлийн таван өдөр үргэлжилсэн өсөлтөө алдлаа. Мөн “Hang Seng Index” бүс нутагтаа хамгийн тааруу үзүүлэлттэй байна.
Татварын 10 хувийн түвшин нь Дональд Трампын сонгуулийн кампанит ажлынхаа үеэр амлаж байсан 60 хувийн татвараас бага дүн болж буй ч хөрөнгө оруулагчид зах зээл илүү тогтворгүй болж магадгүй гэсэн хүлээлттэй байгаа аж.
Дональд Трампын мэдэгдлээс хойш хэдхэн цагийн дараа БНХАУ-ын Ерөнхий сайдын орлогч Дин Шюэсян “БНХАУ импортоо нэмэгдүүлнэ” гэж мэдэгдлээ. “БНХАУ худалдаанаас ашиг олохыг эрэлхийлэхгүй. Бид тэнцвэртэй худалдааг дэмжихийн тулд илүү өрсөлдөх чадвартай, чанартай бүтээгдэхүүн, үйлчилгээг импортлохыг зорьж байна” гэж Дин Шюэсян Дэлхийн Эдийн Засгийн Форумын үеэр хэлсэн үгэндээ онцолжээ.
Сэтгэгдэл бичих