Жагсаал цуглаан хийх эрх чөлөөний тухай хуулийн төслийг УИХ-д өргөн барина гэж Хууль зүй, дотоод хэргийн сайд О.Алтангэрэл өнөөдөр мэдээлэв. Тэрээр “Иргэд жагсаж, үзэл бодлоо илэрхийлэх эрхтэй. Гагцхүү үндэсний аюулгүй байдалтай холбоотой асуудлаас бусдаар энэ эрх чөлөөгөө эдлэх ёстой. Өнгөрсөн хугацаанд жагсаалын үеэр цагдаа нар хүний эрхийг хангахаар ажилласан.
Харамсалтай нь энэ дунд хүний эрх, эрх чөлөөнд халдсан, бие махбодод нь гэмтэл учруулсан байж болзошгүй, хуулиар хориглосон арга хэлбэрээр жагсаал зохион байгуулсан байж болзошгүй мэдээллүүд цагдаагийн байгууллага, холбогдох байгууллагад ирсэн.
Энэ дунд Монгол Улсын хэрэгжүүлж буй төсөл хөтөлбөртэй холбоотой зүйлүүд дээр гаднын оролцоо байж болзошгүй гэсэн сэжиг таамаг илэрсэн. Холбогдох байгууллагууд шалгаж байна.
Монгол бие даасан, тусгаар улс. Өөрийн хил хязгаарын дотор Монгол Улсын Их хурал, Засгийн газар өөрийн бодлогыг явуулна. Монгол Улсын эрх ашиг өөр улсын эрх ашигтай нийцэхгүй байж магадгүй. Тэр нь энд жагсаж буй иргэний лоозонгоор илэрч болохгүй. Хэн нэг санхүүжүүлсэн этгээдийн үгээр Монгол Улсын нутаг дэвсгэр дэх үйл ажиллагаанд саад учруулж болохгүй.
Хөгжлийн төсөл хөтөлбөрүүдэд саад учруулбал ямар хариуцлагатай байх тухай Засгийн газар хууль зүйн хүрээнд судалж байна. Ирэх долоо хоногт Засгийн газрын хуралдаанаар энэ асуудлыг хэлэлцэнэ гэв.
Сэтгэгдэл бичих