БНХАУ-д худалдан авалтын менежерүүдийн индекс сүүлийн гурван сар дараалан 50 нэгжийн түвшинд хадгалагдав.
2025 оны арилжааны эхний өдөр аж үйлдвэрийн металлуудын үнэ өсөлтийн бүсэд арилжааг хаалаа. Энэ онд БНХАУ-д үйлдвэрлэл тэлэхээс гадна Бээжингээс эдийн засгаа дэмжих багц арга хэмжээгээ эрчимжүүлнэ гэж хөрөнгө оруулагчид үзэж байгааг сүүлийн судалгаа харуулсан байна.
Лондоны металлын биржид гуравдугаар сараас хойших доод цэгтээ хаагаад байсан зэсийн үнэ мягмар гарагт бага зэрэг буюу нэг хувиар өсжээ. Мөн цайр, никель, хөнгөн цагаан болон хар тугалганы үнэ өсөж арилжааг хаасан байна.
БНХАУ-д “Caixin” худалдан авалтын менежерүүдийн индекс гурван сар дараалан 50-иас дээш нэгжийн түвшинд хадгалагдлаа. Энэ нь металлын хэрэглээ өндөртэй тус улсын эдийн засаг бага багаар эргэн сэргэж байгааг харуулж байна.
Үүнээс гадна зургаан төрлийн металлын үзүүлэлтийг харуулдаг Лондоны металлын биржийн “lmex Index” 2024 оны сүүлийн арилжааны өдөр дөрвөн хувиар өсөв. Өнгөрсөн оны эцсээр нөөц буурч, уурхайнуудын нийлүүлэлтийн хомсдолтой холбоотойгоор БНХАУ-д металлуудын эрэлт сулраад байсан юм.
Энэ оны хувьд таваарын хөрөнгө оруулагчид БНХАУ-д үл хөдлөх хөрөнгийн салбар эргэн сэргэх эсэх, мөн Дональд Трампын засаглалын үед үүсэж болзошгүй “Худалдааны дайн”-ы нөлөөнд анхаарлаа хандуулж байна.
Сэтгэгдэл бичих