"Тэрбум мод" үндэсний хөдөлгөөний хүрээнд Өмнөговь аймаг 2024 онд 500 мянгаас дээш мод тарихаар төлөвлөсөн юм.
Төлөвлөгөөг хэрэгжүүлэхээр 2024 оны 4 болон 10 дугаар сард “Бүх нийтээр мод тарих үндэсний өдөр”, “Хайлаасны баяр” зэрэг үйл ажиллагааг зохион байгуулж, нийт 263.5 га талбайд 630 779 мод тарьж ургуулсан байна.
Үүнээс өрх бүр жилд есөөс доошгүй мод тарьж ургуулах уриалгын дагуу 3046 өрх хашаандаа 18662 мод тарьсан бол ААНБ-ын орчин тойрон, цэцэрлэгт хүрээлэнгийн 0.5 га талбайд 81283 мод, уул уурхайн чиглэлээр үйл ажиллагаа явуулдаг 13 компани 43.3 га талбайд 210 374 мод тус тус тарьжээ.
Харин нэрэмжит цэцэрлэг, баг хороонд байгуулсан бичил цэцэрлэг бүхий 11.8 га талбайд 99590 мод шинээр болон нөхөн тарьж, Агро ойн аж ахуйг хөгжүүлэхээр төв суурингийн хамгаалалтын ойн зурвасыг 63 га талбайд байгуулж 19706 мод тарьсан байна.
Тус үйл ажиллагаанд төрийн болон хувийн хэвшил, уул уурхайн чиглэлээр үйл ажиллагаа явуулдаг 346 аж ахуйн нэгж, байгууллага, 11069 ажилтан, албан хаагч оролцон 5.3 тэрбум төгрөг зарцуулжээ.
Өмнөговь аймгаас хамгийн олон мод тарьсан нь Цогтцэций сум бөгөөд 240 857 мод тарьжээ.
Хамгийн олон мод тарьсан иргэнээр Даланзадгад сумын иргэн Сосорбарамын Даваахүү тодорч, 1000 гаруй модыг тарьсан талаар Өмнөговь аймгийн БОГ-ын мэргэжилтэн Н.Мөнхгэрэл мэдээллээ.
Мод тарилтад аймгийн цаг уур, газар нутгийн онцлог, говь, цөлийн нөхцөлд дасан ургах чадвартай унаган мод, сөөгийг тарихад чиглэж байгаа бөгөөд 2024 оны тарьсан нийт модны 138 880 буюу 25.4 хувь нь заг, 243 474 буюу 44.5 хувь нь хайлаас мод эзэлж байна.
Сэтгэгдэл бичих