Монгол Улсын Засгийн газрын 2024 оны 41 дүгээр тогтоолын дагуу “Нүүдэлчин” дэлхийн соёлын фестивалийг энэ сарын 16-18-нд Улаанбаатар хотын Налайх дүүргийн III хорооны нутаг дэвсгэрт орших “Тайж хайрханы бэл” хэмээх байгалийн үзэсгэлэнт газарт зохион байгуулах гэж байна.
Монгол Улс Соёлын биет бус өвийг хамгаалах тухай ЮНЕСКО-ийн 2003 оны конвенцид 2005 онд нэгдсэн бөгөөд өөрийн нутаг дэвсгэр дээрх соёлын биет бус өвийг хамгаалах үүргийг олон улсын өмнө хүлээдэг билээ. Энэ удаагийн фестивальд гадаад, дотоодын нийт 1200 гаруй өвлөн уламжлагч оролцож, Соёлын биет бус өвийн долоон ай савын олон төрөл зүйлийн 780 орчим хөтөлбөр, олон талт үйл ажиллагааг үзэгч олондоо сонирхуулах аж.
“Нүүдэлчин” фестиваль нь хүн байгаль хоорондын харилцан шүтэлцээнээс бүрэлдэн тогтсон нүүдлийн ахуй амьдралын хэв маяг, түүнийг даган бий болсон соёлын биет бус өвийг дэлхий дахинд таниулах, түгээн дэлгэрүүлэх, сонирхогч талуудын хүрээг өргөжүүлэх, нүүдлийн соёл иргэншил бүхий орнуудын соёлын хамтын ажиллагааг хөгжүүлэх, соёл хоорондын харилцан ойлголцлыг нэмэгдүүлэх, нүүдлийн соёл, соёлын өвийн баялаг байдлыг сурталчлах, үндэсний дархлааг батжуулах, соёлын бүтээлч үйлдвэрлэл, соёлын аялал жуулчлалыг хөхиүлэн дэмжих, хөгжүүлэхэд чухал ач холбогдолтойг зохион байгуулагчид онцолж байна.
Сэтгэгдэл бичих