Финалд хүрсэн Имане Хелиф: Хүмүүсийн юу гэх нь надад хамаагүй

Алжир улсын боксчин Имане Хелиф энэ удаагийн Парисын олимпийн гол дүрүүдийн нэгээр тодроод байгаа билээ. Эмэгтэйчүүдийн дунд жинд өрсөлдөж буй тэрбээр орон нутгийн цагаар өчигдөр/2024.08.06/ хагас шигшээд Тайландын Жанжаем Суваннапенгийг ялж, финалд шалгарсан юм. Имане Хелиф алтан медалийн төлөө Хятадын Ян Лиутай тулалдана.

Хагас шигшээд ялсныхаа дараа Имане Хелиф "Хүмүүсийн юу гэх нь надад хамаагүй. Надад олимп л хамаатай. Бурхан таалвал би финалд хамгийн сайнаараа тулалдах болно. Би дэлхий нийтийг цэнгүүлэхийн төлөө чадах бүхнээ хийх болно" гэжээ.

Өдгөө 25 настай түүнийг болон Тайванийн боксчин Лин Ю-Тин нарыг эмэгтэй биш гэх яриа, суртал ухуулга ихээр гарсан. Тэгвэл Олон улсын олимпийн хорооны хэвлэлийн төлөөлөгч Марк Адамс "Тэд төрөхдөө эм хүйстэй төрж, эмэгтэй гэж иргэний бүртгэлд бүртгүүлсэн. Олон улсын насанд хүрэгчдийн тэмцээнд ч зургаан жилийн хугацаанд ямар ч асуудалгүй өрсөлдсөн" гэв.

IBA буюу Олон улсын сонирхогчийн боксын холбооны зүгээс Имане Хелиф болон Лин Ю-Тин нарыг тестостероны шинжилгээнд бүдэрсэн гэж үзэн дэлхийн аваргад оролцуулахаас татгалзаж, амжилтыг нь хүчингүйд тооцсон. Гэтэл нэг хардлага байгаа нь Хелиф тухайн үед Оросын боксчинг ялсан байжээ. Мэдээж IBA-г Оросын Умар Кремлёв удирддаг. Тус холбоооны шүүлт асуудал дагуулдаг, авлигад идэгдсэн гэдэг утгаараа энэ удаагийн Парисын олимпийн зохион байгуулагчид өөрсдөө боксын тэмцээнээ зохион байгуулж байгаа билээ.

IBA-ийн шинжилгээний талаар Марк Адамс "Шинжилгээний аргачлал, ямар шинжилгээ авсан зэрэг тэр өдөр юу болсон нь одоог хүртэл тодорхойгүй байна" гэлээ.

Сүүлийн үед өрнөж буй энэ бүх дарамт шахалт, дээрэлхэлт, хэл амыг сөрж рингэнээ гарч, мөнгөн медалийн болзол хангаад буй Имане Хелифийг дэмжих хүмүүс ч их байна. Алжир шиг Исламын шашинтай улсад хүйсээ солиулах хагалгааг хүлээн зөвшөөрөх нь бүү хэл ЛБГТ хүмүүст хүртэл ял өгдөг. Тиймээс Имане Хелиф эрэгтэй хүн байсан, болсон байх ямар ч боломж байхгүй. Дэлхий даяар худал цуурхалд автаж, хүнийг гаднах үзэмжээр нь гутаан доромжилж байгаа нь тун харамсалтай гэх хүмүүс олон байна. Логан Пол тэргүүтэй олны танил эрхмүүд ч худал мэдээлэлд автаж, түүний нэр хүндэд халдсандаа уучлалт гуйжээ.