Олон улсын бизнес эрхлэгч эмэгтэйчүүдийн “SheTrades Summit” өндөр дээд хэмжээний уулзалт Арабын Нэгдсэн Эмират улсад болж байна. Энд манай улсаас "Ханбогд кашимер" компани, “Голомт” банк, “Тэсо” групп гэсэн 9 аж ахуйн нэгжийн төлөөлөгчид оролцож байна.
Төлөөлөгчдийг Монгол Улсаас Арабын Нэгдсэн Эмират улсад суугаа Онц бөгөөд Бүрэн эрхт Элчин сайд Ш.Одонбаатар хүлээн авч уулзлаа. Тэрбээр, булангийн орнуудад Монголын бараа бүтээгдэхүүнийг экспортлох боломжийн талаар санал солилцож, дотоодын, үндэсний үйлдвэрлэгч нартай хамтран ажиллахаа илэрхийллээ.
Олон улсын бизнес эрхлэгч эмэгтэйчүүдийн өндөр дээд хэмжээний уулзалтын үеэр Дэлхийн Худалдааны байгууллага, Олон улсын худалдааны төвийн 13 дахь удаагийн худалдааны сайд нарын хуралдаан болж, “Цахим эдийн засаг дахь Эмэгтэй экспортлогчдыг дэмжих сан”-г нээв.
50 сая ам.доллароор нээсэн олон улсын энэхүү сангаар дамжуулан эмэгтэй бизнес эрхлэгч нарт тулгамдаж буй асуудлыг шийдвэрлэх чиглэлээр улс орнууд хамтарч ажиллах юм. Арабын Нэгдсэн Эмират Улсын Засгийн газраас тус сангийн үйл ажиллагаанд 10 сая ам.долларын дэмжлэг үзүүлж, хамтран ажиллахаа тус улсын Гадаад худалдааны сайд Тани Ахмед Ал Зэёоди илэрхийллээ.
Манай улс уг сангийн үйл ажиллагаанд оролцох бөгөөд МҮХАҮТ-ын дэргэдэх “She Trades Mongolia” төв Монголын эмэгтэй бизнес эрхлэгчдийг дээрх сангийн үйл ажиллагаанд хамруулах боломжийг бүрдүүлэн хариуцан ажиллахаар боллоо.
Сэтгэгдэл бичих