Орчин үеийн Европын Холбооны /ЕХ/ архитектор гэгддэг, Европын Комиссын тэргүүн асан Жак Делор 98 насандаа таалал төгссөн тухай түүний охин мэдээлэв.
Ж.Делор холбооны хил хязгаарын дотор хүмүүс чөлөөтэй зорчих, бараа бүтээгдэхүүн, үйлчилгээ чөлөөтэй урсах нэгдсэн зах зээлийг бий болгоход үнэтэй хувь нэмэр оруулсан билээ.
Европын Комиссын тэргүүний албыг 1985-1995 оны хооронд хашиж байсан тэрбээр мөн Европын нэгдсэн мөнгөн тэмдэгт болох еврогийн үндэс суурийг тавьсан юм.
Харин интеграцын талаар эргэлзэж тээнэгэлзсэн байр суурьтай байдаг хүмүүсийн хувьд, ялангуяа Их Британид түүнийг Брюсселийн хөндлөнгийн оролцооны бэлгэдэл гэж үздэг байна.
Ж.Делорын охин Мартин Обригийн мэдээлснээр, эцэг нь лхагва гаргийн өглөө Парис дахь гэртээ унтаж байхдаа хорвоогийн мөнх бусыг үзүүлжээ.
Францын Ерөнхийлөгч Эммануэль Макрон 1981-1984 онд тус улсын Сангийн сайдаар ажиллаж байсан Ж.Делорыг “Францын нэрт төрийн зүтгэлтэн”, “Манай Европын эцэж цуцаагүй уран дархан” хэмээн магтан сайшаагаад түүний тууштай байдал, үзэл санаа, зөв шударга байдал нь бидэнд үргэлж үлгэр жишээ болсоор байх болно гэлээ.
Ж.Делор Европын Комиссын тэргүүний албыг гурван удаа хашжээ. Өдгөө уг албан тушаалыг хашиж буй Урсула фон дер Ляйен түүнийг “манай Европыг илүү хүчирхэг болгосон алсын хараатай хүн байсан” хэмээн мэдэгджээ. Европын Зөвлөлийн тэргүүн Шарль Мишелийн хувьд, “манай Европыг бүтээн байгуулагчдын нэг хэмээн түүхэнд бичигдсэн агуу франц хүн, агуу европ хүн” хэмээн сайшаасан байна.
Сэтгэгдэл бичих